മുംബൈ: ദേശീയ യൂത്ത് ഫുട്ബോള് ചാമ്പ്യന്ഷിപ്പിന്റെ സ്കൂള് ഗേള്സ് വിഭാഗത്തില് കേരളത്തെ പ്രതിനിധീകരിച്ച് പങ്കെടുക്കുന്ന കോഴിക്കോട് പുറമേരി കടത്തനാട് രാജാസ് ഹയര് സെക്കണ്ടറി സ്കൂള് സെമിഫൈനലില്. അവസാന ഗ്രൂപ്പ് മത്സരത്തില് ഗോവയില് നിന്നുള്ള റോസരി ഹയര് സെക്കണ്ടറി സ്കൂളിനെ ഒന്നിനെതിരെ രണ്ടു ഗോളുകള്ക്ക് തോല്പ്പിച്ചാണ് കടത്തനാട്ടെ പെണ്കുട്ടികള് അവസാന നാലില് ഇടം നേടിയത്.
സെമിയിലെത്താന് ജയം അനിവാര്യമായിരുന്ന കടത്തനാട് സ്കൂളിനെ കളിയുടെ മൂന്നാം മിനിറ്റില് അഞ്ജു എ.ടി.കെ മുന്നിലെത്തിച്ചു. 26-ാം മിനിറ്റില് ഗോവ സമനില പിടിച്ചെങ്കിലും 47-ാം മിനിറ്റില് അശ്വതി വര്മ്മയിലൂടെ ഗോള് നേടി കേരളം വിജയമുറപ്പിച്ചു. മൂന്ന് കളിയില് നിന്ന് ഒരു സമനിലയടക്കം നാലു പോയിന്റുമായി ഗ്രൂപ്പില് രണ്ടാം സ്ഥാനക്കാരായാണ് ടീമിന്റെ സെമി പ്രവേശം.
നാളെ നടക്കുന്ന സെമിയില് ഇംഫാലില് നിന്നുള്ള ചനമ്പം താമ്പവു ഹയര് സെക്കണ്ടറി സ്കൂളാണ് കടത്താനാടിന്റെ എതിരാളികള്. കഴിഞ്ഞ ദിവസം കോളജ് വിഭാഗത്തില് കോട്ടയം ബസേലിയേസ് കോളേജും സെമിഫൈനലില് ഇടം നേടിയിരുന്നു. ഇന്ന് നടക്കുന്ന ആദ്യ സെമിയില് ഷില്ലോങില് നിന്നുള്ള സെന്റ് ആന്റണീസ് കോളേജാണ് ബസേലിയേസിന്റെ എതിരാളികള്.
