പയ്യന്നൂര്: കവ്വായിയില് കഴിഞ്ഞ ദിവസം നടന്ന അക്രമ സംഭവുമായി ബന്ധപ്പെട്ട് ഇരുന്നൂറ് പേര്ക്കെതിരെ പോലീസ് കേസെടുത്തു. കൊടിമരം സ്ഥാപിച്ചതിനെ ചൊല്ലിയുള്ളള വാക്കേറ്റത്തെ തുടര്ന്നാണ് കവ്വായിയില് ലീഗ്-സിപിഎം സംഘര്ഷം നടന്നത്. അക്രമത്തില് ലക്ഷക്കണക്കിന് രൂപയുടെ നഷ്ടം സംഭവിച്ചിട്ടുണ്ട്. സംഭവവുമായി ബന്ധപ്പെട്ട് അഞ്ചുപേരെ അറസ്റ്റ് ചെയ്തു. പോലീസ് സിപിഎമ്മിന് അനുകൂലമായ നിലപാടാണ് സ്വീകരിക്കുന്നത് എന്ന ആക്ഷേപം വ്യാപകമാണ്.
നിഷ്പക്ഷമായ പോലീസ് നടപടി ഇല്ലാത്തത് ഈ മേഖലയിലെ ജനങ്ങളില് പ്രതിഷേധത്തിന് കാരണമായിട്ടുണ്ട്. അക്രമ സംഭവങ്ങളില് ആറ് കേസുകളിലായാണ് ഇരുന്നൂറുപേര്ക്കെതിരെ പോലീസ് കേസെടുത്തിട്ടുള്ളത്. ആറരലക്ഷം രൂപയുടെ നാശനഷ്ടം സംഭവിച്ചതായാണ് കണക്ക്.
കവ്വായിയിലെ സിപിഎം പ്രവര്ത്തകരായ മുകേഷ്, ഇ.അനൂപ്, കെ.രഞ്ചിത്ത്, കെ.വിനീഷ്, മുഹമ്മദ് ഹാഷിം തുടങ്ങിയവരാണ് അറസ്റ്റിലായത്. ഇവര് അഞ്ചുപേരും രജിസ്റ്റര് ചെയ്ത ആറ് കേസുകളിലും പ്രതികളാണ്. പ്രതികളെ കോടതി റിമാന്റ് ചെയ്തു. ഒമ്പത് വീടുകള്ക്കാണ് അക്രമത്തില് നാശനഷ്ടം സംഭവിച്ചിട്ടുള്ളത്. ഇതുകൂടാതെ ഇരുപതോളം വാഹനങ്ങള്ക്കും രണ്ട് ലീഗ് ഓഫീസുകള്ക്കും കേടുപാടുകള് സംഭവിച്ചിട്ടുണ്ട്. നാലുപേര്ക്ക് പരിക്കേല്ക്കുകയും ചെയ്തിരുന്നു.
പയ്യന്നൂര് മേഖലയില് സിപിഎം ക്രിമനലുകള് അഴിഞ്ഞാടുമ്പോഴും പോലീസ് ഇത്തരം ക്രിമിനലുകളെ പ്രോത്സാഹിപ്പിക്കുകയും അക്രമത്തിന് വിധേയരാകുന്നവരെ പീഡിപ്പിക്കുകയും ചെയ്യുന്ന നിലപാടാണ് കൈക്കൊള്ളുന്നത്. ഇത് വ്യാപകമായ പ്രതിഷേധത്തിന് കാരണമാകുന്നുണ്ട്.
