മുഹമ്മ: ആശുപത്രി കെട്ടിടം പൂര്ത്തീകരിച്ച് ആറുമാസത്തിലേറെ കഴിഞ്ഞെങ്കിലും വൈദ്യുതീകരണ ജോലികള് നടന്നില്ല. കെട്ടിടോദ്ഘാടനം വൈകുന്നതിനാല് മുഹമ്മ സാമൂഹികാരോഗ്യകേന്ദ്രത്തിന്റ പ്രവര്ത്തനം അവതാളത്തില്.
മന്ത്രി പി. തിലോത്തമന്റെ 2012-13ലെ മണ്ഡല ആസ്തി വികസന ഫണ്ടില് ഉള്പ്പെടുത്തി 55 ലക്ഷം രൂപ മുടക്കിയാണ് കെട്ടിടം പണിതത്. പെയ്ന്റിങ് അടക്കമുള്ള ജോലികള് പൂര്ത്തീകരിച്ചെങ്കിലും വൈദ്യുതീകരണ ജോലികള് ഇതുവരെയും ആരംഭിച്ചിട്ടില്ല. വൈദ്യുതീകരണ ജോലി ഇനി ചെയ്യുമ്പോള് വീണ്ടും അറ്റകുറ്റപ്പണി വേണ്ടിവരും. കെട്ടിട നിര്മ്മാണത്തോടൊപ്പം വൈദ്യുതീകരണ ജോലിയ്ക്കുമുള്ള കരാര് നല്കാത്തതാണ് പ്രശ്നമായത്. വൈദ്യുതീകരണ ജോലികള്ക്കായി കരാര് ക്ഷണിച്ചെങ്കിലും ആരും വരുന്നില്ലായെന്നാണ് അധികാരികള് പറയുന്നത്.
ആശുപത്രിയില് 24 മണിക്കൂര് പ്രവര്ത്തനമാരംഭിച്ചതോടെ രോഗികളുടെ എണ്ണവും വര്ദ്ധിച്ചു.അതിനനുസരിച്ചുള്ള സൗകര്യങ്ങളില്ല. പൂര്ത്തീകരിച്ച കെട്ടിടത്തില് താഴത്തെ നിലയില് സ്ത്രീകളുടെയും കുട്ടികളുടെയും പ്രതിരോധ കുത്തിവെയ്പ്പും രോഗനിര്ണ്ണ ലാബും മറ്റും പ്രവര്ത്തിക്കും. രണ്ടാം നിലയിലേയ്ക്ക് ഓഫീസ് പ്രവര്ത്തനം മാറ്റും. അതോടെ ഒഴിവുവരുന്ന കെട്ടിടത്തില് മാവേലി മെഡിക്കല് സ്റ്റോറും തുറന്ന് പ്രവര്ത്തിക്കാനായിരുന്നു ലക്ഷ്യമിട്ടിരുന്നത്.
വൈദ്യുതീകരണ ജോലികള് താമസിക്കുന്നതോടെ പ്രഖ്യാപനങ്ങള് വെറും പാഴ്വാക്കുകള് മാത്രമാകുകയാണ്.
