ചെന്നൈ : കേരളത്തിലെ വനങ്ങളില്‍ ആനകളുടെ എണ്ണം വന്‍തോതില്‍ കുറഞ്ഞതായി റിപ്പോര്‍ട്ട്. അഞ്ചു വര്‍ഷത്തിനുള്ളില്‍ 2888 ആനകളാണ് കുറഞ്ഞത്. കേന്ദ്ര പരിസ്ഥിതി വികസന മന്ത്രാലയം ലോക്‌സഭയെ അറിയിച്ചതാണിത്. 2012 ല്‍ 5942 ആനകളാണ് ഉണ്ടായിരുന്നത്. ഇത് 2017ല്‍ 3054 ആയി കുറഞ്ഞു.
വരള്‍ച്ചയെത്തുടര്‍ന്ന് വനങ്ങളിലെ ആനകള്‍ മറ്റ് സംസ്ഥാനങ്ങളിലേക്ക് വാസസ്ഥലം മാറിയതും എണ്ണം കുറയാന്‍ കാരണമായേക്കാം. കേരളത്തിലാണ് ഏറ്റവും കുടുതല്‍ ആനകളുടെ എണ്ണത്തില്‍ കുറവ് വന്നിരിക്കുന്നത്. നാഷണല്‍ എലഫന്റ് സെന്‍സസ് 2017ലാണ് ഇതുസംബന്ധിച്ചുള്ള കണക്കുകളുള്ളത്.
തമിഴ്‌നാടാണ് പട്ടികയില്‍ രണ്ടാം സ്ഥാനത്ത്. ഇതുപ്രകാരം 2012ല്‍ 4,015 ആയിരുന്നത് 2,761 ആയി കുറഞ്ഞു. സംസ്ഥാനത്തുമാത്രം 30 ശതമാനം ഇടിവാണ് ഉണ്ടായിരിക്കുന്നത്. ദക്ഷിണേന്ത്യന്‍ സംസ്ഥാനങ്ങളിലാണ് ഈ കണക്ക്. എന്നാല്‍ കര്‍ണ്ണാടകയില്‍ 2012ല്‍ 6488 ആയിരുന്നത് 2017ല്‍ എത്തിയപ്പോള്‍ 439 എണ്ണം കുറഞ്ഞ് 6049 ആയി.
ആന്ധ്രപ്രദേശില്‍ മാത്രം ആനകളുടെ എണ്ണം വര്‍ധിച്ചു. അഞ്ചുവര്‍ഷം മുമ്പ് 45 ആനകള്‍ ഉണ്ടായിരുന്നത് 16 എണ്ണം വര്‍ധിച്ച് 61 ആയിട്ടുണ്ട്.
ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് സയന്‍സ് പ്രൊഫസര്‍ രാമണ്‍ സുകുമാറാണ് ഈ സെന്‍സസിന് നേതൃത്വം നല്‍കിയത്. വര്‍ഷത്തില്‍ രണ്ടു പ്രാവശ്യമാണ് ആനകള്‍ക്കുള്ള സെന്‍സസ് നടത്താറുണ്ട്. വേനല്‍ക്കാലത്തും മഴക്കാലത്തും.
അതേസമയം കഴിഞ്ഞ വരള്‍ച്ചാ സമയത്ത് ആനകള്‍ കൂട്ടത്തോടെ ചത്തതായി റിപ്പോര്‍ട്ടില്ല. വേനല്‍ അടുത്തപ്പോള്‍ത്തന്നെ പച്ചപ്പുള്ള സ്ഥലത്തേയ്‌ക്ക് ചേക്കേറിയെന്നാണ് കണക്കാക്കുന്നത്.
