തലശ്ശേരി: കണ്ണൂര്, കാസര്കോഡ് ജില്ലകളിലെ ഏതാനും ചില സഹകരണ സ്ഥാപനങ്ങളിലെ നിയമനങ്ങളെയും സ്ഥാനക്കയറ്റത്തിനെയും ഇന്നും ആരോപണങ്ങളുടെ’ മുള്മുനയില് തളച്ചിട്ട തലശ്ശേരിയിലെ വ്യാജ ബിരുദ സര്ട്ടിഫിക്കറ്റ് നിര്മ്മാണക്കേസ് ദുരുഹ സാഹചര്യത്തില് അട്ടിമറിഞ്ഞതായി സൂചന. തലശ്ശേരി നഗര മധ്യത്തില് പ്രവര്ത്തിച്ചിരുന്ന അമൃത കോളേജില് നിന്ന് രാജ്യത്തെ പന്ത്രണ്ടോളം യൂണിവേഴ്സിറ്റികളുടെ നൂറ് കണക്കിന് വ്യാജ സര്ട്ടിഫിക്കറ്റുകള് കണ്ടെടുക്കപ്പെട്ട കേസാണ് ഒന്നര വര്ഷം നീണ്ട അന്വേഷണ പ്രഹസനങ്ങള്ക്കൊടുവില് എങ്ങുമെത്താത്ത നിലയിലുള്ളത്. അട്ടിമറിക്ക് പിന്നില് ഉന്നതതല സമ്മര്ദ്ദവും സാമ്പത്തിക ഇടപാടുകളും ആരോപിക്കപ്പെടുന്നുണ്ട്.
രാജ്യത്ത് സംശയത്തിന്റെ നിഴലിലുള്ള പന്ത്രണ്ടോളം യൂണിവേഴ്സിറ്റികളുടെ ബിരുദ സര്ട്ടിഫിക്കറ്റുകള് തരാതരം പോലെ ആവശ്യക്കാര്ക്ക് നിര്മ്മിച്ചു നല്കിയിരുന്ന നഗരമദ്ധ്യത്തിലെ സ്ഥാപനത്തില് കഴിഞ്ഞ വര്ഷം സപ്തമ്പറിലാണ് തലശ്ശേരി ഡിവൈഎസ്പിയും സംഘവും റെയ്ഡ് നടത്തി നൂറ് കണക്കിന് വ്യാജ സര്ട്ടിഫിക്കറ്റുകള് കണ്ടെടുത്തത്. തുടരന്വേഷണത്തില് ഇവ നിര്മ്മിക്കാന് ഉപയോഗിച്ച കമ്പ്യൂട്ടറുകള്, ലാപ്ടോപ്, ഹാര്ഡ് ഡിസ്ക്, ഹോളോഗ്രാം, കളര് പ്രിന്റര്, വിവിധ തരം സീലുകള്, സര്ട്ടിഫികക്കറ്റ് കടലാസുകള് എന്നിവയും പിടിച്ചെടുത്തു. ഇവിടെ നിന്നും സര്ട്ടിഫിക്കറ്റ് വാങ്ങി നിരവധി പേര് സ്വദേശത്തും വിദേശത്തും ജോലി നേടിയതായി തെളിവുകള് പോലീസിന് ലഭിച്ചതോടെ അന്വേഷണം വ്യാപിപ്പിച്ചു.
അഭ്യസ്ഥ വിദ്യരായ ഉദ്യോഗാര്ത്ഥികള് അലയുന്ന നാട്ടില് പത്താംതരത്തില് പഠനം നിര്ത്തിയവര് പോലും ബിരുദധാരികളായി ജോലി ചെയ്തുവരുന്നതിന്റെ അണിയറ രഹസ്യം ഞെട്ടിപ്പിക്കുന്നതായിരുന്നു. നാല്പതിനായിരം മുതല് ഒരുലക്ഷത്തിനാല്പതിനായിരം വരെ ആവശ്യക്കാരില് നിന്നും ഈടാക്കിയാണ് അമൃതാ കോളേജില് നിന്നും അങ്ങാടി കണക്കെ ബിരുദ ബിരുദാനന്തര സര്ട്ടിഫിക്കറ്റുകള് നല്കിയിരുന്നതെന്ന് അന്വേഷണ ഉദ്യോഗസ്ഥര് കണ്ടെത്തിയിരുന്നു. തെളിവുകളുടെ ബലത്തില് അറസ്റ്റിലായ സ്ഥാപന ഉടമ പിണറായി പാറപ്രത്തെ വടക്കയില് അജയന്, സഹായി തിരുവനന്തപുരം വട്ടിയൂര്കാവിലെ ഹില്വ്യൂവില് ട്വിന്റു ബി.ഷാജി എന്നിവര് ജാമ്യത്തിലിറങ്ങിയതോടെയാണ് വ്യാജ സര്ട്ടിഫിക്കറ്റ് നിര്മ്മാണക്കേസില് മരവിപ്പ് ഉണ്ടായത്. ജാമ്യത്തിലിറങ്ങിഏതാനും മാസങ്ങള് പിന്നിട്ടതോടെ വ്യാജ സര്ട്ടിഫിക്കറ്റ് നിര്മ്മാണ ഫാക്ടറിയെന്ന് അറിയപ്പെട്ട അമ്യത കോളേജ് വീണ്ടും സജീവമായി. പത്രപരസ്യങ്ങളിലൂടെയും ഫെയ്സ് ബുക്കിലൂടെയും പ്രചരണം കൊഴുക്കുകയാണിപ്പോള്.
