ഫട്ടോര്ഡ: ആദ്യ ജയം സ്വപ്നം കണ്ട് ഗോവയില് പന്തുതട്ടാനിറങ്ങിയ കേരള ബ്ലാസ്റ്റേഴ്സിന് ദയനീയ തോല്വി. ഗോവ എഫ്സിക്കെതിരെ ഇന്നലെ നടന്ന കളിയില് രണ്ടിനെതിരെ അഞ്ച് ഗോളുകള്ക്കാണ് ബ്ലാസ്റ്റേഴ്സ് തകര്ന്നടിഞ്ഞത്.
ഗോള്മഴ കണ്ട കളിയില് ഒരു ഗോളിന് മുന്നിട്ടുനിന്നശേഷമാണ് ബ്ലാസ്റ്റേഴ്സ് തകര്ച്ചയിലേക്ക് മൂക്കുകുത്തി വീണത്. ഏഴ് മിനിറ്റിനിടെ ഹാട്രിക്ക് നേടിയ സ്പാനിഷ് സ്ട്രൈക്കര് ഫെറാന് കൊറോമിനസാണ് ഗോവയുടെ വിജയശില്പി. മറ്റൊരു സ്പാനിഷ് താരം ലാന്സറോട്ടെയാണ് മറ്റ് രണ്ട് ഗോളുകള്ക്ക് അവകാശി. മുന് മത്സരങ്ങളില് നിന്ന് വ്യത്യസ്തമായി ജിംഗാനും പെസിച്ചും ഉള്പ്പെട്ട പ്രതിരോധം കളി മറന്നതും ബ്ലാസ്റ്റേഴ്സിന് തിരിച്ചടിയായി. ബ്ലാസ്റ്റേഴ്സിനായി സിഫ്നിയോസും ജാക്കിചന്ദുമാണ് ലക്ഷ്യം കണ്ടത്.
കഴിഞ്ഞ കളിയില് നിന്ന് ഒരു മാറ്റവുമായാണ് ബ്ലാസ്റ്റേഴ്സ് കളത്തിലെത്തിയത്. സസ്പെന്ഷനിലായ സി.കെ. വിനീതിന് പകരം ലോകന് മെയ്തേയി കളത്തിലെത്തി.
കളിയുടെ തുടക്കത്തില് തന്നെ ബ്ലാസ്റ്റേഴ്സ് നിരയില് നിരാശ പടര്ന്നു. നാലാം മിനിറ്റില് പരിക്കേറ്റ സൂപ്പര്താരം ദിമിത്രി ബര്ബറ്റോവ് തിരിച്ചുകയറി. പകരം എത്തിയത് മിലന് സിങ്. അധികം കഴിയും മുന്നേ ഗോവയെ ഞെട്ടിച്ച് കേരളം ആദ്യം നിറയൊഴിച്ചു. വലതുവിങ്ങില് നിന്ന് ജാക്കിചന്ദ് നീട്ടിനല്കിയ പാസ് നീട്ടിയ കാലില് പിടിച്ചെടുത്ത് സിഫ്നിയോസ് തൊടുത്ത വലംകാലന് ഷോട്ട് ഗോവ ഗോളിയുടെ കൈകള്ക്കിടയിലൂടെ ചോര്ന്ന് വലയില് (1-0). ലീഡ് നേടിയ ബ്ലാസ്റ്റേഴ്സിന്റെ ആഹ്ലാദം ഏറെ നീണ്ടുനിന്നില്ല.
ഒമ്പതാം മിനിറ്റില് സമാനമായൊരു ഗോളിലൂടെ ഗോവ എഫ്സി സമനില പിടിച്ചു. നാരായണ് ദാസ് നല്കിയ പാസ് സ്വീകരിച്ച് മാനുവല് ലാന്സറോട്ടെ പായിച്ച ഷോട്ട് ബ്ലാസ്റ്റേഴ്സ് ഗോളി റെച്ചൂബ്ക പറന്ന് തട്ടിയെങ്കിലും പോസ്റ്റിലിടിച്ച് വലയില് കയറി (1-1). പിന്നീട് ഗോവയുടെ മികച്ച മുന്നേറ്റങ്ങളാണ് കണ്ടത്. 18-ാം മിനിറ്റില് അവര് ലീഡ് നേടി. ഫെറാന് കൊറോമിനാസിന്റെ പാസില് നിന്ന് ലക്ഷ്യം കണ്ടത് ഇത്തവണയും ലാന്സറോട്ടെ. മൂന്നുമിനിറ്റിനുശേഷം ലാന്സറോട്ടെ എടുത്ത ഫ്രീകിക്ക് ബ്ലാസ്റ്റേഴ്സ് ഗോളി പറന്ന് രക്ഷപ്പെടുത്തി. 30-ാം മിനിറ്റില് ബ്ലാസ്റ്റേഴ്സിന്റെ സമനിലഗോള്. മിലന്സിങ് നല്കിയ പാസ് സ്വീകരിച്ച് മുന്നേറി ബോക്സില് പ്രവേശിച്ച ശേഷം ജാക്കിചന്ദ് സുന്ദരമായ ഷോട്ടിലൂടെ വലയിലെത്തിച്ചു. ഇതോടെ ആദ്യപകുതി 2-2 ന് സമനില.
രണ്ടാം പകുതി തുടങ്ങി രണ്ട് മിനിറ്റ് ആയപ്പോഴേക്കും ഗോവ ലീഡ് നേടി. അഹമ്മദ് ജഹൗവിന്റെ പാസില് നിന്ന് ഫെറാന് കൊറോമിനസാണ് ഗോള് നേടിയത്. 51-ാം മിനിറ്റില് കൊറോമിനസ് തന്റെ രണ്ടാമത്തെയും ഗോവയുടെ നാലാം ഗോളും നേടി. ബ്രണ്ടന് ഫെര്ണാണ്ടസാണ് ഗോളിന് വഴിയൊരുക്കിയത്. മൂന്ന് മിനിറ്റിനുശേഷം കൊറോമിനസ് ഹാട്രിക്ക് തികച്ചു. വലതുവിംഗില് നിന്ന് ലാന്സറോട്ടെ നല്കിയ ക്രോസ് നല്ലൊരു ഷോട്ടിലൂടെയാണ് കൊറോമിനസ് വലയിലെത്തിച്ചത്. കഴിഞ്ഞ മത്സരങ്ങളില് നിന്നെല്ലാം വ്യത്യസ്തമായി പ്രതിരോധം പൊട്ടിപ്പൊളിഞ്ഞതോടെയാണ് കേരളം വന് പരാജയത്തിലേക്ക് വീണു. 15ന് നോര്ത്ത് ഈസ്റ്റുമായി കൊച്ചിയിലാണ് ബ്ലാസ്റ്റേഴ്സിന്റെ അടുത്ത കളി.
