ഇറ്റാനഗര്‍: ബ്രഹ്മപുത്ര നദി തിരിച്ചുവിടാന്‍ ചൈന ശ്രമിക്കുന്നുവെന്ന ആക്ഷേപവുമായി അരുണാചല്‍ പ്രദേശില്‍ നിന്നുള്ള കോണ്‍ഗ്രസ് എംപി രംഗത്ത്. ഓര്‍മിയില്‍ പോലുമില്ലാത്ത വിധം ബ്രഹ്മപുത്ര (അരുണാചലില്‍ നദിയുടെ പേര് സിയാങ്) കലങ്ങിയൊഴുകുന്നത് ചൈന അവരുടെ ഭാഗത്ത് നദിയില്‍ ടണല്‍ നിര്‍മിക്കുന്നതിനാലെന്ന് ചൂണ്ടിക്കാട്ടി നിനോങ് എറിങ് എംപി പ്രധാനമന്ത്രി നരേന്ദ്ര മോദിക്ക് കത്തയച്ചു.
വിഷയത്തില്‍ പ്രധാനമന്ത്രി അടിയന്തരമായി ഇടപെടണമെന്നും നിര്‍മാണമുണ്ടോയെന്നു പരിശോധിക്കാന്‍ അന്താരാഷ്‌ട്ര സംഘത്തെ അയയ്‌ക്കണമെന്നും എറിങ് ആവശ്യപ്പെട്ടു. നദി ചെളി നിറമായാണ് ഒഴുകുന്നത്. നവംബര്‍ മാസത്തില്‍ ഇതെങ്ങനെയെന്നാണ് സംശയം. നദിയില്‍ മത്സ്യങ്ങളടക്കമുള്ള ജീവജാലങ്ങളെ കാണാനില്ല. ചൈനയുടെ ഭാഗത്തുള്ള നിര്‍മാണമാണ് ഇതിനു കാരണമെന്ന് ഉറപ്പ്, കത്തില്‍ പറയുന്നു.
ഷിന്‍ജിയാങ് പ്രവിശ്യയിലേക്ക് വെള്ളമെത്തിക്കുന്നതിന് 1,000 കിലോമീറ്റര്‍ ദൂരമുള്ള ടണല്‍ ചൈന നിര്‍മിക്കുന്നെന്നാണ് ആക്ഷേപം. എന്നാല്‍, അവരിത് നിഷേധിക്കുന്നു. ഇന്ത്യ, ചൈന, ബംഗ്ലാദേശ് രാജ്യങ്ങള്‍ക്ക് ബ്രഹ്മപുത്ര നദിക്കു മേല്‍ തുല്യ അവകാശമാണുള്ളത്.
