മലമ്പുഴ:ജില്ലയിലെ പ്രധാന അണക്കെട്ടിന്റെ വൃഷ്ടി പ്രദേശ കവാടം മലമ്പുഴ പഞ്ചായത്തിലെ ചെറാട് പട്ടികജാതി കോളനിയില്‍ കുടിവെള്ളം കിട്ടാക്കിനിയാവുന്നു.അര്‍ദ്ധ രാത്രിക്കുശേഷം പലപ്പോഴും വരുന്ന കുടിവെള്ളം മൂലം കോളനിക്കാര്‍ കുടിക്കുന്നത് സമീപത്തെ തോട്ടിലെ മലിന ജലമെന്നത് ഖേദകരമാണ്.
ദുര്‍ഗ്ഗനഗര്‍ പട്ടികജാതിക്കോളനിയിലെ 300 ഓളം കുടുംബങ്ങളാണ് വേനല്‍ക്കാലത്ത് കുടിക്കാന്‍ ശുദ്ധജലമില്ലാതെ നരകിക്കുന്നത്. കഴിഞ്ഞ വര്‍ഷം കോളനി നിവാസികള്‍ക്ക് പഞ്ചായത്തു വക കുടിവെള്ള കണക്ഷന്‍ നല്‍കിയിരുന്നു. എന്നാല്‍ അര്‍ദ്ധരാത്രിക്കുശേഷം നൂലു പോലെ വരുന്ന വെള്ളത്തില്‍ നിന്നും ഒരു കുടം തികയ്‌ക്കണമെങ്കില്‍ നേരം പുലരും.
ഇതിനാല്‍ ഭക്ഷണം പാകം ചെയ്യാനും കുടിക്കാനുള്ള വെള്ളത്തിനായി ഒരു കിലോ മീറ്ററപ്പുറത്തുള്ള തോട്ടില്‍ കുഴിയുണ്ടാക്കിയാണ് കോളനിക്കാര്‍ കുടിവെള്ളമെടുക്കുന്നത്.എന്നാല്‍ സമീപത്തെ റെസിഡന്റ്‌സ് കോലനികളില്‍ 24 മണിക്കൂറും മലമ്പുഴ വെള്ളം ലഭിക്കുമ്പോഴാണ് പട്ടികജാതി കോളനിയില്‍ മാത്രം സമയത്ത് വെള്ളമെത്തിക്കാത്തതിന്റെ പൊരുളറിയതെ നട്ടം തിരിയുന്നത്.
ഇതിനായി ഗ്രാമ പഞ്ചായത്തിലും ജല അതോറിറ്റിയിലും നിരന്തരം പരാതികള്‍ നല്‍കിയിട്ടും അധികൃതര്‍ അനങ്ങാപ്പാറ നയമാണ് സ്വീകരിക്കുന്നത്.തുച്ഛമായ വരുമാനം കൊണ്ട് ദിവസം തള്ളിനീക്കുന്നസാധാരണക്കാരന്റെ കുടിവെള്ളത്തിനായുള്ള ദുരവസ്ഥക്കു മുന്നില്‍ ആരോടു പരാതി പറയണമെന്നറിയാതെയിരിക്കുകയാണ് കോളനിക്കാര്‍.ജലക്ഷാമം രൂക്ഷമാകുന്ന വേനലില്‍ ജലസ്രോതസ്സുകളും കുടിവെള്ള പദ്ധതികുളമൊക്കെ നോക്കികുത്തികളാവുന്ന സാഹചര്യത്തില്‍ മലമ്പുഴ അണക്കെട്ടു പ്രദേശത്തെ ഒരു കോളനിയില്‍ കുടിവെള്ളം പോലും കിട്ടാതെ മലിന ജലം കുടിച്ച സ്വമേധയാ മാരകരോഗവാഹകരാവാന്‍ വിധിക്കപ്പെട്ടവരാണ് ചെറാട് കോളനി നിവാസികള്‍.
ഭരണപരിഷ്‌കാര ചെയര്‍മാന്റെ തട്ടകത്തിലെ ഒരു കോളനിക്കാര്‍ക്ക് ഇത്തരമൊരു ദുരവസ്ഥ എത്രനാള്‍ താങ്ങേണ്ടിവരുമെന്നറിയാതെ കുടിവെള്ളത്തിനായി കുടത്തിനുമുന്നില്‍ കണ്ണും നട്ടിരിക്കുകയാണ് ചെറാട് കോളനിക്കാര്‍.
പ്രതികരിക്കാൻ ഇവിടെ എഴുതുക: