കോഴിക്കോട്: ഇസ്രായേല് വിസ്മയിപ്പിക്കുന്ന ഒരു രാഷ്ട്രമാണെന്ന് ഡോ.എം.ജിഎസ് നാരായണന് പറഞ്ഞു. ഷാബു പ്രസാദ് രചിച്ച് കുരുക്ഷേത്ര പ്രസിദ്ധീകരിക്കുന്ന ”ഇസ്രായേല് അതിജീവനത്തിന്റെ അഗ്നി നാളങ്ങള്” എന്ന പുസ്തകം പ്രകാശനം ചെയ്ത് സംസാരിക്കുകയായിരുന്നു അദ്ദേഹം.
നാഷന് സ്റ്റേറ്റ് എന്ന രാഷ്ട്രസങ്കല്പ്പത്തിന് അടിസ്ഥാനപരമായി ഭൂമിയുണ്ടാകണം. എന്നാല് ആയിരക്കണക്കിന് വര്ഷക്കാലം ഒരു തുണ്ട് ഭൂമി പോലും സ്വന്തമായില്ലാതെ അവര് രാജ്യമായി നിലനിന്നു. ഹീബ്രു ഭാഷയെ ആധുനിക ഭാഷയായി നിലനിര്ത്തി. ഒറ്റപ്പെടുകയും പീഡിപ്പിക്കപ്പെടുകയും ചെയ്തിട്ടും അവര് രാജ്യമില്ലാതെ രണ്ടായിരത്തില്പരം വര്ഷം രാഷ്ട്രമായി നിലനിന്നു.
ധൈഷണിക മേഖലയിലും ശാസ്ത്ര, തത്വശാസ്ത്ര മേഖലകളിലും അവര് മികച്ചു നിന്നു. വംശബോധം നിലനിര്ത്തി ലോക ജീവിതത്തിന്റെ വിവിധ മേഖലകളില് പ്രഭാവം ഉണ്ടാക്കി. ആധുനിക സാങ്കേതിക വിദ്യയെ വികസിപ്പിച്ച് ചെറുതെങ്കിലും ശക്തമായ രാഷ്ട്രമായി നില നില്ക്കുന്ന ഇസ്രായേലിന്റെ ചരിത്രം പഠിക്കേണ്ടതാണെന്ന് എംജിഎസ് പറഞ്ഞു.
ആര്ക്കിയോളജിക്കല് സര്വേ ഓഫ് ഇന്ത്യ മുന് ഡയറക്ടര് കെ.കെ. മുഹമ്മദ് പുസ്തകം ഏറ്റുവാങ്ങി. കേസരി മുഖ്യ പത്രാധിപര് ഡോ. എന്. ആര് മധു പുസ്തക പരിചയം നടത്തി. എന്.ബിടി എക്സ്ക്യൂട്ടീവ് അംഗം ഇ. നന്ദകുമാര് അദ്ധ്യക്ഷത വഹിച്ചു. പ്രൊഫ. കെ.വി. തോമസ്, കെ.ടി. തോമസ്, ഹരികൃഷ്ണന് ഹരിദാസ് എന്നിവര് സംസാരിച്ചു. ഷാബു പ്രസാദ് മറുപടി പ്രസംഗം നടത്തി.
