ഇടത്താവളങ്ങളെ കൈയ്യൊഴിയരുത്
ഇടത്താവളങ്ങളില് ശബരിമല തീര്ഥാടകര്ക്ക് ആവശ്യമായ അടിസ്ഥാന സൗകര്യങ്ങൡ. വഴിപാടുപോലെ അവലോകന യോഗങ്ങള് നടത്തി തീരുമാനങ്ങള് പ്രഖ്യാപിക്കും. ഒന്നും നടപ്പാക്കില്ല. ഈ സീസണിലും ഇക്കാര്യത്തില് മാറ്റമില്ല. നിലയ്ക്കല്, എരുമേലി, കാനന പാതകള് എന്നിവിടങ്ങളില് ഒരുക്കങ്ങള് പാതി വഴിയിലാണ്.
നിലയ്ക്കലില് കുടിവെള്ളമില്ല
കഴിഞ്ഞ കാലത്ത് നിലയ്ക്കലില് ഭക്തര് വലഞ്ഞത് കുടിവെള്ളമില്ലാതെ. പരിഹാരമായി ശബരിമല മാസ്്റ്റര് പ്ലാനില് ഉള്പ്പെടുത്തി ഒരു കോടി മുടക്കി നിര്മ്മിച്ച ചെക്ക് ഡാം ചെളിയും മാലിന്യവും നിറഞ്ഞു. ആസൂത്രണമില്ലാതെ നിര്മ്മിച്ച ഈ ഡാമിലേക്കാണ് മാലിന്യങ്ങള് ഒഴുകിയെത്തുന്നത്. പാര്ക്കിങ് ഗ്രൗണ്ടിന്റെ നിര്മ്മാണം സീസണ് തുടങ്ങിയതോടെ നിര്ത്തി. റോഡുകളുടെ അറ്റകുറ്റപ്പണി മാത്രം തീര്ത്തു. 110 ഏക്കര് ഗ്രൗണ്ടില് ടാറിങ് നടത്തിയിട്ടില്ല. മഴ പെയ്താല് ചെളിയാകും. പുതിയ ആശുപത്രി ഈ സീസണില് തുറക്കാനിടയില്ല.
എരുമേലിയില് മാലിന്യം
എരുമേലിയില് ക്രമീകരണങ്ങള് ഒരുങ്ങുന്നതേയുളളു. റോഡുകളുടെ അറ്റകുറ്റപ്പണി പൂര്ത്തിയായിട്ടില്ല. കൊടിത്തോട്ടത്തില് നഗരമാലിന്യം മലപോലെയാണ്. ദുര്ഗന്ധവും ഈച്ചകളും അസഹനീയം. കണ്ണീര് പോലെയുള്ള കൊച്ചുതോട് തീര്ത്ഥാടന കാലത്ത് മലിനമാകും. പത്ത് ശുചിമുറികളില് കൂടുതലുള്ള കെട്ടിട ഉടമകള് സ്വന്തമായി മാലിന്യ സംസ്കരണ പ്ലാന്റ് സ്ഥാപിക്കണം. എന്നാല് തീരുമാനം നടപ്പായില്ല. മണ്ഡലക്കാലം തുടങ്ങാന് ഒരാഴ്ച മാത്രമുള്ളപ്പോഴാണ് കവുങ്ങുമുഴിയിലെ പ്ലാന്റ് പ്രവര്ത്തിപ്പിച്ചു തുടങ്ങിയത്. ഇവിടെ പ്ലാസ്റ്റിക് പൊടിക്കാനുള്ള യന്ത്രങ്ങള് എത്തിച്ചു.
ആശുപത്രി സജ്ജമല്ല
എരുമേലിയിലെ ആശുപത്രിയില് അപകടങ്ങള് േനരിടാനുള്ള സൗകര്യമില്ല. അപകടമുണ്ടായാല് കാഞ്ഞിരപ്പള്ളി താലൂക്ക് ആശുപത്രിയോ, കോട്ടയം മെഡിക്കല് കോളേജോ ശരണം. ദേവസ്വം കെട്ടിടത്തിലാണ് 24 മണിക്കൂറും പ്രവര്ത്തിക്കുന്ന താല്ക്കാലിക ഡിസ്പെന്സറി .സാമൂഹികാരോഗ്യകേന്ദ്രത്തില് ഐ .സി യൂണിറ്റുണ്ട്. എന്നാല് ട്രോമാ കെയര് ഇല്ല. എല്ലാ വിധ സൗകര്യവുമുള്ള ആശുപത്രി ദീര്ഘകാല ആവശ്യമാണ്. ഇതിന് പരിഹാരമായിട്ടാണ് കേന്ദ്രം 100 കോടിയുടെ ശബരിമല പദ്ധതിയില്പ്പെടുത്തി എരുമേലിയില് ആയുര്വേദ, അലോപ്പതി ആശുപത്രി നിര്മ്മിക്കുന്നത്. തുക അനുവദിച്ചെങ്കിലും സംസ്ഥാന സര്ക്കാരിന്റെ മെല്ലപ്പോക്ക് കാരണം സീസണ് തൊട്ട് മുമ്പാണ് നിര്മാണം തുടങ്ങിയത്.
കണമല സമാന്തരപാത നോക്കുകുത്തിയായി
കണമല സമാന്തര പാതയിലൂടെ തീര്ത്ഥാടക വാഹനങ്ങള് കടത്തിവിടില്ല.ഈ വഴിയുള്ള യാത്ര അപകടകരമാണെന്ന പോലീസ് റിപ്പോര്ട്ടാണ് കാരണം.എരുത്വപ്പുഴ -കീരിത്തോട് -കണമല റോഡില് കുത്തനെയുള്ള ഇറക്കവും വളവുകളുമാണ്. ഇത് കണമല ഇറക്കത്തേക്കാളും അപകടം നിറഞ്ഞതാണെന്നാണ് പോലീസ് പറയുന്നത്.ആറര കോടി ചെലവഴിച്ച് നിര്മ്മിച്ച ഈ റോഡിന്റെ നിര്മ്മാണം അശാസ്ത്രീയമാണ്.
കാനനപാതകളില് വെളിച്ചമില്ല
കാനന പാതകളില് വെള്ളവും വെളിച്ചവുമായിട്ടില്ല. വൈകിട്ട് ആറ് വരെ മാത്രമാണ് കാനനപാതയിലൂടെ പോകാന് അനുവദിക്കൂ. അടിക്കാടുകള് വെട്ടിത്തെളിക്കുകമാത്രമാണ് ചെയ്തത്.വന സംരക്ഷണ സമിതി പ്രവര്ത്തകരുടെ സഹായത്തോടെ വനപാലകര് വെള്ളവും വെളിച്ചവും എത്തിക്കുമെന്നാണ് പറയുന്നത്. കാനന പാതകളില് ആന ശല്യം ഉള്ളതിനാല് എലിഫന്റ് സ്ക്വാഡിനെ നിയമിക്കണമെന്ന ആവശ്യവും ശക്തമാണ്.കോയിക്കല് കാളകെട്ടി കാനന പാതയില് മൂന്ന് ഓക്സിജന് പാര്ലര് ഉണ്ടാകും. എന്നാല് പ്രാഥമിക ചികിത്സാസൗകര്യമില്ല. കാളകെട്ടിയില് ആംബുലന്സ് ഏര്പ്പെടുത്തുമെന്നാണ് അധികൃതര് പറയുന്നത്.
സുഖ ദര്ശനത്തിന്
അയ്യപ്പദര്ശനത്തിന് കിലോമീറ്ററുകള് താണ്ടി വരുന്ന ഭക്തര്ക്ക് സുഖ ദര്ശനം ഒരുക്കേണ്ടത് സര്ക്കാരിന്റെയും ദേവസ്വം ബോര്ഡിന്റെയും ബാധ്യതയാണ്. ഇതിനായി ഒരുക്കങ്ങള് സീസണ് അവസാനിച്ച് കഴിയുമ്പോള് തന്നെ അടുത്ത സീസണിലേക്ക് തുടങ്ങണം. ഇതോടൊപ്പം വിവിധ വകുപ്പുകള് തമ്മിലുള്ള തര്ക്കങ്ങളും പരിഹരിക്കണം. ശബരിമലയുടെ കാനനഭംഗി നിലനിര്ത്താനും മാലിന്യ രഹിതമാക്കനുമുള്ള പ്രവര്ത്തനങ്ങളും മുന്കൂട്ടി ആസൂത്രണം ചെയ്യേണ്ടത് അനിവാര്യമാണ്.
(അവസാനിച്ചു)
