ശബരിമല: മാതാ അമൃതാനന്ദമയി മഠത്തിന്റെ നേതൃത്വത്തില് രണ്ടു ദിവസമായി തുടര്ന്ന ശബരിമല ശുചീകരണ യജ്ഞം പൂര്ത്തിയായി. ജൈവ അജൈവ മാലിന്യങ്ങള് വേര്തിരിച്ച് സംസ്ക്കരിച്ചു. പമ്പയിലെ ശുചീകരണയജ്ഞത്തില് കേന്ദ്രമന്ത്രി അല്ഫോണ്സ് കണ്ണന്താനം പങ്കാളിയായി.
മഠത്തിന്റെ സേവനപ്രവര്ത്തങ്ങളെ അനുമോദിക്കുന്നതായും ക്ലാസുമുറികളില് നിന്നും ലഭിക്കുന്നതിനേക്കാള് അറിവും അനുഭവവും സ്വായത്തമാക്കാന് ഇത്തരം സേവനപ്രവര്ത്തനങ്ങളില് പങ്കാളികളാവുന്നതോടെ വിദ്യാര്ഥികള്ക്ക് സഹായകമാവുമെന്നും കേന്ദ്രമന്ത്രി പറഞ്ഞു. സര്ക്കാരുകള് സ്വഛ് ഭാരത് പോലുള്ള പദ്ധതികള് പ്രഖ്യാപിക്കുമ്പോള് അത് നടപ്പിലാക്കേണ്ടത് ഓരോ പൗരന്റെയും കര്ത്തവ്യമാണ് എന്ന് അദ്ദേഹം കൂട്ടിച്ചേര്ത്തു.
അമൃതാനന്ദമയി മഠത്തില് നിന്നുള്ള വിദേശികളടക്കമുള്ള ആശ്രമ അന്തേവാസികളൂം അയല് സംസ്ഥാനങ്ങളില് നിന്നുള്ള വിവിധ അമൃത സ്ഥാപനങ്ങളിലെ വിദ്യാര്ഥികളും ജീവനക്കാരും ശുചീകരണ യജ്ഞത്തില് പങ്കാളികളായി.
