കൊല്ക്കത്ത: നാകയന്റെ കളി പുറത്തെടുത്ത സഞ്ജുവിന്റെ സെഞ്ചുറിയില് ബോര്ഡ് പ്രസിഡന്റ്സ് ഇലവന് ശ്രീലങ്കക്കെതിരായ ദ്വിദിന സന്നാഹ മത്സരം സമനിലയാക്കി.
രണ്ട് വിക്കറ്റിന് 31 റണ്സെന്ന നിലയില് തകര്ന്ന ബോര്ഡ് പ്രസിഡന്റ്സ് ഇലവനെ, ശ്രീലങ്കന് ടെസ്റ്റ് ടീമിന്റെ ആക്രമണത്തെ ശക്തിയുക്തം നേരിട്ട് സഞ്ജു ഉയര്ത്തിക്കൊണ്ടുവന്നു. 143 പന്ത് നേരിട്ട ഈ മലയാളി ബാറ്റ്സ്മാന് 128 റണ്സ് സ്വന്തം പേരില് കുറിച്ചു. 19 ഫോറും ഒരു സിക്സറും പൊക്കി.
ശ്രീലങ്കയുടെ ഒമ്പതിന് 411 റണ്സിന് മറുപടി പറഞ്ഞ ബോര്ഡ് പ്രസിഡന്റ്സ് ഇലവന് 75 ഓവറില് അഞ്ചു വിക്കറ്റിന് 287 റണ്സിലെത്തിനില്ക്കെ ഇരു ക്യാപ്റ്റന്മാരും മത്സരം സമനിലയാക്കാന് സമ്മതിക്കുകയായിരുന്നു.
പരിക്കേറ്റ നമാന് ഓജയ്ക്ക് പകരം മത്സരത്തലേന്ന് ക്യാപ്റ്റനായി നിയമിക്കപ്പെട്ട സഞ്ജു ശ്രീലങ്കന് ആക്രമണത്തെ അനായാസം നേരിട്ടു. മൂന്ന് മികച്ച കൂട്ടുകെട്ടുകളുണ്ടാക്കി ടീമിനെ ഉയര്ത്തിക്കൊണ്ടുവന്നു. മൂന്നാം വിക്കറ്റില് ജീവന്ജ്യോത് സിങ്ങുമൊത്ത്് 68 റണ്സും കേരളാ ടീമിലെ സഹകളിക്കാരനായ രോഹന് പ്രേമുമൊത്ത് നാലാം വിക്കറ്റില് 71 റണ്സും ബി സന്ദീപുമൊത്ത് അഞ്ചാം വിക്കറ്റില് 85 റണ്സും കുട്ടി ചേര്ത്തു.
രോഹന് പ്രേം 61 പന്തില് അഞ്ചു ഫോറുള്പ്പെടെ 39 റണ്സും ജീവന്ജ്യോത് സിങ്ങ് 99 പന്തില് മൂന്ന് ഫോര് അടക്കം 35 റണ്സും സന്ദീപ് 74 പന്തില് മൂന്ന് ഫോറുള്പ്പെടെ 33 ( നോട്ടൗട്ട്) റണ്സും നേടി.
സമരവിക്രമയുടെ പന്തില് ഡിക്ക്വെല്ലയ്ക്ക് ക്യാച്ച് നല്കിയാണ് സഞ്ജു സാംസണ് മടങ്ങിയത്.
ഇന്ത്യക്ക് തുടക്കത്തില് തന്നെ രണ്ട് വിക്കറ്റുകള് നഷ്ടമായി. 16 റണ്സ് കുറിച്ച ഓപ്പണര് അഗര്വാള് തിരിമാനെയുടെ പന്തില് വിക്കറ്റിന് മുന്നില് കുടുങ്ങി.
തുടര്ന്നെത്തിയ ഭണ്ഡാരി മൂന്ന് റണ്സുമായി കളിക്കളം വിട്ടു. തിരിമാനെയുടെ പന്തില് ഷനാക ക്യാച്ചെടുത്തു.
തിരിമാനെ രണ്ട് വിക്കറ്റും പെരേര, ഡിസില്വ , സമരവിക്രമ എന്നിവര് ഓരോ വിക്കറ്റും വീഴ്ത്തി.
പിച്ചില് നിന്ന് ബൗളര്മാര്ക്ക് പ്രയോജനം ലഭിച്ചില്ല. ശ്രീലങ്ക പത്ത് ബൗളര്മാരെ ഉപയോഗിച്ചു. വിക്കറ്റ് കീപ്പറായ നിരോഷന് ഡിക്ക്വെല്ലയാണ് അവസാന ഓവര് എറിഞ്ഞത്. അതേസമയം ഓള് റൗണ്ടര് ഏയ്ഞ്ചലോ മാത്യൂസ് ബൗളിങ്ങിനിറങ്ങിയില്ല.
പരുക്കില് നിന്ന് മോചിതനായി അടുത്തിടെയാണ് മാത്യൂസ് കളിക്കളത്തിലെത്തിയത്. ഇന്ത്യക്കെതിരായ ടെസ്റ്റ് പരമ്പരയില് മാത്യൂസ് പന്തെറിയില്ലെന്ന് ശ്രീലങ്കയുടെ ബൗളിങ്ങ് കോച്ച് റുമേഷ് രത്നായകെ പറഞ്ഞു.
ഇന്ത്യ- ശ്രീലങ്ക ഒന്നാം ടെസ്റ്റ് 16 ന് കൊല്ക്കത്തയിലെ ഈഡന് ഗാര്ഡനില് ആരംഭിക്കും.
സ്കോര്: ശ്രീലങ്ക ഒമ്പതു വിക്കറ്റിന് 411 ഡിക്ലയേര്ഡ് ( സമരവീര 74, കരുണരത്ന 50, മാത്യൂസ് 54) . ബോര്ഡ് പ്രസിഡന്റ്സ് ഇലവന് : അഞ്ചു വിക്കറ്റിന് 287 ( സഞ്ജു സാംസണ് 128, രോഹന് പ്രേം 39)
