പഴയങ്ങാടി(കണ്ണൂര്): പിലാത്തറ മണ്ടൂരില് നിയന്ത്രണംവിട്ട സ്വകാര്യ ബസ്സിടിച്ച് സ്ത്രീ യും മകനും ഉള്പ്പെടെ അഞ്ചുപേര് മരിച്ചു. പത്തോളം പേര്ക്ക് ഗുരുതരമായി പരിക്കേറ്റു. ഇന്നലെ രാത്രി എട്ട് മണിയോടെ പിലാത്തറ-പഴയങ്ങാടി കെഎസ്ടിപി റോഡില് മണ്ടൂര് ജുമാമസ്ജിദിന് സമീപമാണ് നാടിനെ നടുക്കിയ ദുരന്തമുണ്ടായത്.
ചെറുകുന്ന് അമ്പലപ്പുറത്തെ സുജിത്ത് പട്ടേരി(38), പാപ്പിനിശ്ശേരി ഗേറ്റിലെ കെ.മുസ്തഫ(55), ഏഴോത്തെ പി.പി.സുബൈദ(45), മകന് മുര്ഷിദ്(18), പെരുമ്പ കെഎസ്ആര്ടിസി സ്റ്റേഷന് സമീപത്തെ കരീം(45) എന്നിവരാണ് മരിച്ചത്.
ഈ റൂട്ടില് പോവുകയായിരുന്ന സ്വകാര്യബസ്സിന്റെ ടയര് പഞ്ചറായതിനാല് ഇതിലെ യാത്രക്കാര് അടുത്ത ബസ്സില് കയറാന് റോഡിലിറങ്ങി നില്ക്കുകയായിരുന്നു. ഈ സമയത്ത് ഇതേ റൂട്ടില് അമിതവേഗതയില് വന്ന മറ്റൊരു ബസ്സ് യാത്രക്കാരെ കണ്ട് പെട്ടെന്ന് ബ്രേക്ക് ചെയ്തപ്പോള് നിയന്ത്രണം വിട്ട് യാത്രക്കാരുടെ ഇടയിലേക്ക് പാഞ്ഞുകയറി മുന്നിലെ ബസ്സിലിടിച്ച് നില്ക്കുകയായിരുന്നു.
പയ്യന്നൂരില് നിന്നും പഴയങ്ങാടിയിലേക്ക് വരികയായിരുന്ന അന്വിദ എന്ന ബസ്സിന്റെ ടയറാണ് പഞ്ചറായത്. പിറകെ വന്ന ഹില്ട്ടണ് എന്ന ബസ്സാണ് അപകടത്തിനിടയാക്കിയത്. അപകടസമയത്ത് ശക്തമായ മഴയുണ്ടായത് രക്ഷാപ്രവര്ത്തനങ്ങള്ക്ക് തടസ്സമായി. മൂന്നുപേര് സംഭവസ്ഥലത്തും രണ്ടുപേര് പരിയാരം മെഡിക്കല് കോളേജ് ആശുപത്രിയിലുമാണ് മരണപ്പെട്ടത്. പരിക്കേറ്റ അടുത്തില സ്വദേശികളായ അനീഷ്, രവീന്ദ്രന്, വി.മുരളി, അംബിക, മണ്ടൂരിലെ ശശി, വയലപ്രയിലെ ഷീന, പഴയങ്ങാടിയിലെ അന്ഷിദ, അന്യസംസ്ഥാന തൊഴിലാളിയായ സുധീര് എന്നിവരടക്കം 10 പേരാണ് പരിയാരം മെഡിക്കല് കോളേജ് ആശുപത്രിയില് ചികിത്സയിലുള്ളത്. ഇവരില് പലരുടെയും നില ഗുരുതരമാണ്. സംഭവമറിഞ്ഞ് വിവിധ രാഷ്ട്രീയ സാമൂഹിക സംഘടനാ പ്രവര്ത്തകര് പരിയാരം മെഡിക്കല് കോളേജിലെത്തി.
