തിരുവനന്തപുരം: ദീന്ദയാല് ഉപാധ്യായയുടെ പേരിലുള്ള ദേശീയ സെമിനാര് അലങ്കോലമാക്കാന് എസ്എഫ്ഐ ശ്രമം. ഉപാധ്യായയുടെ ജന്മദിനത്തോടനുബന്ധിച്ച് കേരളത്തിലെ കേന്ദ്ര സര്വ്വകലാശാല സംഘടിപ്പിച്ച സെമിനാര് അലങ്കോലപ്പെടുത്താനുള്ള ശ്രമം അക്രമത്തിന്റെ വക്കിലെത്തി്.
സംസ്ഥാനത്തിന് പുറത്തുള്ള വിവിധ സര്വകലാശാലകളില് നിന്നുള്ള പ്രൊഫസര്മാരും വിദഗ്ധന്മാരും നൂറോളം വിദ്യാര്ഥികളും പങ്കെടുത്ത സെമിനാര് കനകക്കുന്നിലായിരുന്നു.
ചെന്നൈ സിസിഎസ് യൂണിവേഴ്സിറ്റിയിലെ രാഷ്ട്രതന്ത്രം വിഭാഗം മേധാവി പ്രൊഫ സഞ്ജീവ്കുമാര് ശര്മ ഉദ്ഘാടന പ്രസംഗം നടത്തിക്കൊണ്ടിരിക്കുമ്പോള് എസ്എഫ്ഐക്കാര് കനകക്കുന്ന് കൊട്ടാരത്തിലെ വേദിയിലേക്ക് പ്രകടനമായി എത്തി. മാര്ച്ച് നേരിടാനുള്ള പോലീസ് സ്ഥലത്തില്ലായിരുന്നു. കൊട്ടാരത്തിന്റെ മതില് ചാടിക്കടന്ന് സെമിനാര് നടക്കുന്ന വേദിയിലേക്ക് തള്ളിക്കയറാന് ശ്രമിച്ചു. ഉദ്യോഗസ്ഥരുടെ സമയോചിതമായ ഇടപെടല് മൂലം വന് അക്രമം ഒഴിവായി.
കൊടി കെട്ടിയ വടികളുമായി ചീറിയടുത്ത പ്രതിഷേധക്കാരെ കണ്ടയുടന് കൊട്ടാരത്തിലെ സുരക്ഷാ ഉദ്യോഗസ്ഥര് അകത്തുനിന്ന് സെമിനാര് ഹാളിന്റെ കവാടങ്ങള് പൂട്ടി. ഈ സമയം ഒ. രാജഗോപാല് എംഎല്എ ഉള്പ്പെടെ, നൂറു കണക്കിന് വിദ്യാര്ഥികളും അധ്യാപകരും ഹാളില് ഉണ്ടായിരുന്നു.
സെന്ട്രല് യൂണിവേഴ്സിറ്റി ഓഫ് കേരള വൈസ് ചാന്സലര് പ്രൊഫ. ഡോ ജി. ഗോപകുമാര് അധ്യക്ഷത വഹിച്ചു. സ്കൂള് ഓഫ് കള്ച്ചറല് സ്റ്റഡീസ് ഡീന് പ്രൊഫ. കെ. ജയപ്രസാദ്, ഒ. രാജഗോപാല് എംഎല്എ, പ്രൊഫ. എം.എസ്. ജോണ്, ഡോ എം. മോഹന്ദാസ് എന്നിവര് സെമിനാറില് പങ്കെടുത്തു.
