ഒരു മത്സരത്തിനു മാത്രമാണ് ആശിഷ് നെഹ്റയ്ക്ക് പരമ്പരയ്ക്കുള്ള ടീമിലിടം ലഭിച്ചത്. അത് ടെസ്റ്റ്, ഏകദിനങ്ങളില് നിന്ന് നേരത്തെ മടങ്ങിയ മുപ്പത്തിയെട്ടുകാരനായ ഈ ഇടംകൈയന് പേസര്ക്ക് ട്വന്റി20യില് വിടവാങ്ങാന്. ട്വന്റി20യില് അടുത്തിടെ ഇന്ത്യക്കായി മികച്ച പ്രകടനം നടത്തിയതിനുള്ള സമ്മാനം.
മറ്റു പല ഇതിഹാസങ്ങള്ക്കും ലഭിക്കാത്ത ആദരത്തിനു പിന്നില് നായകന് വിരാട് കോഹ്ലി. അങ്ങനെ നായകന്റെ നാട്ടുകാരന് നാട്ടില് തന്നെ വിടവാങ്ങലൊരുങ്ങുന്നു. ഇന്ന് ഭുവനേശ്വറിനു പകരം നെഹ്റയെ കളിപ്പിക്കാനാണ് സാധ്യത.
ഇതുവരെ 26 മത്സരങ്ങള് കളിച്ച നെഹ്റയ്ക്ക് 34 വിക്കറ്റുകളുണ്ട്. 19 റണ്സിന് മൂന്നു വിക്കറ്റ് മികച്ച പ്രകടനം.
2004ല് റാവല്പിണ്ടിയില് പാക്കിസ്ഥാനെതിരെ അവസാന ടെസ്റ്റ് കളിച്ച നെഹ്റ, 17 കളികളില് 44 വിക്കറ്റ് നേടി. ഇന്നിങ്സിലെ മികച്ച പ്രകടനം 72 റണ്സിന് നാല് വിക്കറ്റ്. 1999ല് കൊളംബൊയില് ശ്രീലങ്കയ്ക്കെതിരെയായിരുന്നു ആദ്യ മത്സരം.
ഏകദിനത്തില് അതിനേക്കാള് മികവ് പ്രകടിപ്പിച്ചു ഈ ദല്ഹിക്കാരന്. 2001ല് ഹരാരെയില് സിംബാബ്വെയ്ക്കെതിരെ അരങ്ങേറി. 120 മത്സരങ്ങളില് 157 വിക്കറ്റ്. മികച്ച പ്രകടനം 23 റണ്സിന് ആറു വിക്കറ്റ്. രണ്ടു തവണ അഞ്ച് വിക്കറ്റ് നേടി. 2011ല് മൊഹാലിയില് പാക്കിസ്ഥാനെതിരെ അവസാന മത്സരം.
