മുംബൈ: ന്യൂസിലാന്ഡിനെതിരായ ഏകദിന പരമ്പരയിലെ ത്രസിപ്പിക്കുന്ന വിജയത്തിനു പിന്നാലെ ഇന്ത്യയുടെ നായകന് വിരാട് കോഹ്്ലി ഐസിസി റാങ്കിങ്ങില് വീണ്ടും കുതിച്ചു. ഏകദിനത്തിലെ ഒന്നാം റാങ്ക് കോഹ്ലി തിരിച്ചു പിടിച്ചു.
പത്തു ദിവസം മുമ്പ് ദക്ഷിണാഫ്രിക്കന് താരം എബി ഡി വില്ലിയേഴ്സിനു മുന്നില് ഒന്നാം നമ്പര് നഷ്ടപ്പെട്ടതിനു ശേഷമാണ് ഇന്ത്യയുടെ പ്രിയ നായകന് തിരിച്ചു വന്നത്. ന്യൂസിലാന്ഡിനെതിരായ പരമ്പരയില് രണ്ടു സെഞ്ചുറികളുമായി മിന്നുന്ന പ്രകടനം കാഴ്ചവെച്ച കോഹ്ലി 889 പോയിന്റുകള് നേടിയാണ് റാങ്കിങ്ങില് മുന്നിലെത്തിയത്. സച്ചിന് ടെന്ഡുല്ക്കറിന്റെ റെക്കോഡും കോഹ്്ലി മറികടന്നു. ഏറ്റവും കൂടുതല് പോയിന്റുകളോടെ ഒന്നാം റാങ്ക് നേടുന്ന ബാറ്റ്സ്മാന് എന്ന റെക്കോഡാണ് കോഹ്ലി സ്വന്തമാക്കിയത്. 1998ല് 887 പോയിന്റുകളോടെ സച്ചിന് ഒന്നാം റാങ്കിലെത്തിയതിന്റെ റെക്കോഡാണ് കോഹ്ലി തിരുത്തിയത്.
മൂന്നു സ്ഥാനങ്ങള് മെച്ചപ്പെടുത്തി ബൗളര്മാരുടെ റാങ്കിങ്ങില് മൂന്നാമതെത്തിയത് ജസ്പ്രീത് ബുംറയുടേതാണ് മറ്റൊരു ശ്രദ്ധേയമായ ഇന്ത്യന് കുതിപ്പ്. പാക്കിസ്ഥാന്റെ ഹസന് അലിയുടേയും ദക്ഷിണാഫ്രിക്കയുടെ ഇമ്രാന് താഹിറിന്റേയും പിന്നിലാണ് ഇപ്പോള് ബുംറ.
ന്യൂസാലാന്ഡിനെതിരായ പരമ്പരയില് ആറു വിക്കറ്റുകള് വീഴ്ത്തിയ ബുംറ, മൂന്നാം ഏകദനിത്തിലെ അവസാന ഓവറില് ഇന്ത്യയെ വിജയത്തിലേക്കു നയിക്കുന്ന പ്രകടനവും പുറത്തെടുത്തു. ജയിക്കാന് 15 റണ്സെടുക്കേണ്ടിയിരുന്ന ന്യൂസിലാന്ഡിനെ ആ ആറു പന്തുകളില് ബുംറ വരിഞ്ഞു കെട്ടി. ആറു റണ്സിന്റെ ആവേശകരമായ വിജയത്തിന് ഇന്ത്യ ബുംറയോടു കടപ്പെട്ടിരിക്കുന്നു. ഈ വര്ഷം ഇതുവരെ 20 ഏകദിനങ്ങളില് നിന്ന് ഈ ഫാസ്റ്റ് ബൗളര് 35 വിക്കറ്റുകള് വീഴ്ത്തിക്കഴിഞ്ഞു.
നിര്ണായക മൂന്നാം ഏകദിനത്തിലെ സെഞ്ചുറിയടക്കം പരമ്പരയില് 174 റണ്സെടുത്ത ഓപ്പണര് രോഹിത് ശര്മയ്ക്ക് കരിയറിലെ മികച്ച പോയിന്റ് നേടാന് കഴിഞ്ഞു. 799 പോയിന്റുള്ള രോഹിത് ഇപ്പോള് ഏഴാം സ്ഥാനത്തു തന്നെയാണ്. വനിതാ ക്രിക്കറ്റിലെ ഇന്ത്യയുടെ സൂപ്പര് താരം മിതാലി രാജും ഐസിസി ഏകദിന റാങ്കിങ്ങില് നമ്പര് വണ്. കഴിഞ്ഞ ലോകകപ്പില് മിന്നുന്ന പ്രകടനം കാഴ്ചവെച്ച മിതാലി രണ്ടാം സ്ഥാനത്തിനു നിന്നാണ് ഒന്നാം റാങ്കിലേക്കു കുതിച്ചത്.
753 പോയിന്റുകളോടെയാണ് ഇന്ത്യന് ക്യാപ്റ്റന്റെ മുന്നേറ്റം. 725 പോയിന്റോടെ ഓസ്ട്രേലിയയുടെ എല്ലിസെ പെറിയാണ് രണ്ടാം സ്ഥാനത്ത്. ന്യൂസിലാന്ഡിന്റെ അമി സാറ്റര്ത്ത്വൈറ്റാണ് മൂന്നാമത് (720).
ഒന്നാം നമ്പറായിരുന്ന ഓസ്ട്രേലിയയുടെ മെഗ് ലാന്നിങ് നാലാം സ്ഥാനത്തേക്കു പിന്നിലായതാണ് ഐസിസി റാങ്കിങ്ങില് ശ്രദ്ധേയമായത്. പരിക്കിനെത്തുടര്ന്ന് ഇംഗ്ലണ്ടിനെതിരായ പരമ്പരയില് നിന്നു പിന്മാറേണ്ടി വന്നതാണ് ലാന്നിങ്ങിനു വിനയായത്.
ബൗളര്മാര്ക്ക് സ്ഥാനചലനങ്ങളില്ല. 652 പോയിന്റുകളുള്ള ഇന്ത്യയുടെ ഝുലന് ഗോസ്വാമി രണ്ടാമത് തന്നെ. ദക്ഷിണാഫ്രിക്കയുടെ മാരിസന്നെ കാപ് (656) തന്നെ ഒന്നാമത്. ഇംഗ്ലണ്ടിനെതിരായ പരമ്പര രണ്ട്-ഒന്നിനു വിജയിച്ച ഓസ്ട്രേലിയ ടീം വിഭാഗത്തില് ഒന്നാം റാങ്ക് നിലനിര്ത്തി.
