കാണ്പൂര്: ഒരുപിടി ബാറ്റിങ് റെക്കോഡുകള്ക്ക് ഗ്രീന്പാര്ക്ക് സാക്ഷ്യം വഹിച്ചു. ഏകദിന ക്രിക്കറ്റില് വേഗത്തില് 9,000 റണ്സ് തികയ്ക്കുന്ന ബാറ്റ്സ്മാനായി ഇന്ത്യന് നായകന് വിരാട് കോഹ്ലി. 202 കളികളില് 194 ഇന്നിങ്സില് നിന്ന് നേട്ടം. ദക്ഷിണാഫ്രിക്കയുടെ എ.ബി. ഡിവില്ലേഴ്സിനെയാണ് വിരാട് മറികടന്നത്.
ഇന്നലെ 32-ാം സെഞ്ചുറി കുറിച്ച വിരാടിന്റെ സമ്പാദ്യം 9,030 റണ്സ്. സെഞ്ചുറി നേട്ടത്തില് ഇനി ഇതിഹാസ താരം സച്ചിന് ടെന്ഡുല്ക്കര് (49) മാത്രമാണ് ഇന്ത്യന് നായകന് മുന്നിലുള്ളത്. ഈ വര്ഷം മൂന്നു ഫോര്മാറ്റിലുമായി 2,000 റണ്സ് തികച്ച ആദ്യ താരവുമാണ് വിരാട്. ദക്ഷിണാഫ്രിക്കയുടെ ഹാഷിം അംല (1988) പിന്നാലെ.
ഏകദിനത്തില് 15ാം സെഞ്ചുറി കുറിച്ച രോഹിത് ശര്മയ്ക്കൊപ്പവും വിരാട് റെക്കോഡ് ബുക്കില് ഇടംനേടി. നാലാമത്തെ ഇരട്ട സെഞ്ചുറി കൂട്ടുകെട്ടാണ് കിവികള്ക്കെതിരെ ഇവര് പടുത്തുയര്ത്തിയത്. സച്ചിന്-ഗാംഗുലി (മൂന്ന്), വിരാട്-ഗംഭീര് (മൂന്ന്) കൂട്ടുകെട്ടുകള് ഇവര് മറികടന്നു. ഇന്നലെ രണ്ടാം വിക്കറ്റില് വിരാടും രോഹിതും 230 റണ്സ് ചേര്ത്തു. ഇവര് 12 തവണ സെഞ്ചുറി കൂട്ടുകെട്ടിലും ഭാഗമായി.
ഈ വര്ഷം അഞ്ചാം സെഞ്ചുറി നേടിയ രോഹിത് ഏകദിനത്തില് 1,000 റണ്സ് തികച്ചു. ഇതുവരെ 1,076 റണ്സ്. 1,460 റണ്സുമായി വിരാടാണ് ഈ പട്ടികയിലും മുന്നില്. കാണ്പൂരില് തുടരെ രണ്ടാം മത്സരത്തിലും രോഹിത് സെഞ്ചുറി നേടി.
