കാണ്പൂര്: ആദ്യമൊന്ന് പേടിപ്പിച്ചു. പിന്നെ സമ്മര്ദത്തില് ഇടറി വീണു. തുടരെ ഏഴാം പരമ്പര ജയമെന്ന ഇന്ത്യയുടെ മോഹങ്ങള്ക്ക് വിലങ്ങു തടിയാകാന് ന്യൂസിലന്ഡിനായില്ല. മൂന്നാം ഏകദിനത്തില് കിവികളെ ആറ് റണ്സിന് തോല്പ്പിച്ച് 2-1ന് ഇന്ത്യ പരമ്പര സ്വന്തമാക്കി. സ്കോര്: ഇന്ത്യ – 337/6, ന്യൂസിലന്ഡ് – 331/7 (50).
ഇന്ത്യയുടെ വലിയ സ്കോറിലേക്ക് ആത്മവിശ്വാസത്തോടെ ബാറ്റേന്തിയ കിവികള്ക്ക് മിന്നും ഫോമില് കളിക്കുന്ന ഓപ്പണര് കോളിന് മണ്റോയുടെ (75) ആക്രമണോത്സുകത തുണയായി. ഭുവനേശ്വര് കുമാറിന്റെ ആദ്യ ഓവറില് മണ്റോ 19 റണ്സ് നേടി. ടോം ലഥം (65), നായകന് കെയ്ന് വില്യംസണ് (64), റോസ് ടെയ്ലര് (39), ഹെന് റി നിക്കോള്സ് (37) എന്നിവരും പിന്തുണ നല്കി. 48ാം ഓവറില് ടോം ലഥം റണ്ണൗട്ടായതാണ് മത്സരത്തില് വഴിത്തിരിവായത്. പിന്നീട് കാര്യങ്ങള് കിവികളുടെ കൈയില് നിന്ന് പോയി. അവസാന ഓവറുകളിലെ ഏറ്റവും അപകടകാരിയായ ബൗളറാണ് താനെന്ന് തെളിയിച്ച് ജസ്പ്രീത് ബുംറം വീണ്ടും നായകന്റെ പ്രതീക്ഷ കാത്തു. പത്തോവറില് 47 റണ്സ് വഴങ്ങി ബുംറ മൂന്നു വിക്കറ്റെടുത്തു. യുസ്വേന്ദ്ര ചഹല് രണ്ടും, ഭുവനേശ്വര് കുമാര് ഒന്നും വിക്കറ്റെടുത്തു.
നേരത്തെ, ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യ ഓപ്പണര് രോഹിത് ശര്മ (147), നായകന് വിരാട് കോഹ്ലി (113) എന്നിവരുടെ ബാറ്റിങ് മികവിലാണ് 337 റണ്സ് അടിച്ചു കൂട്ടിയത്. രണ്ടാം വിക്കറ്റില് സഖ്യം 230 റണ്സ് ചേര്ത്തു. രോഹിതിന്റേത് കരിയറിലെ 15ാം സെഞ്ചുറി. 138 പന്തില് 18 ഫോറും രണ്ടു സിക്സറുമടക്കം 147 റണ്സ്. 32 സെഞ്ചുറിയാണ് വിരാട് നേടിയത്. 106 പന്തില് ഒമ്പത് ഫോറും ഒരു സിക്സറും ആ ബാറ്റില് നിന്ന് പിറന്നു. എം.എസ്. ധോണി (25), കേദാര് ജാദവ് (18), ശിഖര് ധവാന് (14) എന്നിവരും സംഭാവന നല്കി. ടിം സൗത്തി, ആദം മില്നെ, മിച്ചല് സാന്റ്നര് എന്നിവര്ക്ക് രണ്ടു വീതം വിക്കറ്റ്.
സ്കോര്ബോര്ഡ്
ഇന്ത്യ
രോഹിത് ശര്മ സി സൗത്തി ബി സാന്റ്നര് 147, ശിഖര് ധവാന് സി വില്യംസണ് ബി സൗത്തി 14, വിരാട് കോഹ്ലി സി വില്യംസണ് ബി സൗത്തി 113, ഹാര്ദിക് പാണ്ഡ്യ സി സൗത്തി ബി സാന്റ്നര് 8, എം.എസ്. ധോണി സി മണ്റോ ബി മില്നെ 25, കേദാര് ജാദവ് സി ഗുപ്ടില് ബി മില്നെ 18, ദിനേശ് കാര്ത്തിക് നോട്ടൗട്ട് 4, എക്സ്ട്രാസ് 8, ആകെ 50 ഓവറില് ആറ് വിക്കറ്റിന് 337 റണ്സ്.
വിക്കറ്റ് വീഴ്ച: 1-29, 2-259, 3-273, 4-302, 5-331, 6-337.
ബൗളിങ്: ടിം സൗത്തി 10-0-66-2, ട്രെന്റ് ബൗള്ട്ട് 10-0-81-0, ആദം മില്നെ 10-0-64-2, കോളിന് ഡി ഗ്രാന്ഡ്ഹോം 8-0-57-0, മിച്ചല് സാന്റ്നര് 10-0-58-2, കോളിന് മണ്റോ 2-0-10-0.
ന്യൂസിലന്ഡ്
മാര്ട്ടിന് ഗുപ്ടില് സി കാര്ത്തിക് ബി ബുംറ 10, കോളിന് മണ്റോ ബി ചഹല് 75, കെയ്ന് വില്യംസണ് സി ധോണി ബി ചഹല് 64, റോസ് ടെയ്ലര് സി ജാദവ് ബി ബുംറ 39, ടോം ലഥം റണ്ണൗട്ട് (ധോണി/ബുംറ) 65, ഹെന്റി നിക്കോള്സ് ബി ഭുവനേശ്വര് 37, കോളിന് ഡി ഗ്രാന്ഡ് ഹോം നോട്ടൗട്ട് 8, മിച്ചല് സാന്റ്നര് സി ധവാന് ബി ബുംറ 9, ടിം സൗത്തി നോട്ടൗട്ട് 4, എക്സ്ട്രാസ് 20, ആകെ 50 ഓവറില് ഏഴ് വിക്കറ്റിന് 331 റണ്സ്.
വിക്കറ്റ് വീഴ്ച: 1-44, 2-153, 3-168, 4-247, 5-306, 6-312, 7-326.
ബൗളിങ്: ഭുവനേശ്വര് കുമാര് 10-0-92-1, ജസ്പ്രീത് ബുംറ 10-0-47-3, ഹാര്ദിക് പാണ്ഡ്യ 5-0-47-0, അക്ഷര് പട്ടേല് 7-0-40-0, കേദാര് ജാദവ് 8-0-54-0, യുസ്വേന്ദ്ര ചഹല് 10-0- 47-2.
