പാലാ: സീനിയര് ആണ്കുട്ടികളുടെ ട്രിപ്പിള്ജമ്പില് ഉജ്ജ്വല പ്രകടനവുമായി പറളി സ്കൂളിന്റെ എന്. അനസ് മീറ്റിന്റെ താരമായി. കഴിഞ്ഞ തവണ തന്നെ പിന്നിലാക്കിയ സഹപാഠി എ. അജിത്തിനെ മറികടന്നായിരുന്നു അനസിന്റെ റെക്കോഡ് പ്രകടനം. ഒപ്പം ദേശീയ റെക്കോര്ഡും മറികടന്നു. അനസ് 15.30 ദൂരം താണ്ടിയാണ് പുതിയ മീറ്റ് റെക്കോര്ഡിന് ഉടമയായത്.
അനസിന്റെ പ്രകടനത്തില് വഴിമാറിയത് 2014-ല് കല്ലടി എച്ച്എസ്എസിന്റെ അബ്ദുള്ള അബൂബക്കറിന്റെ പേരിലുള്ള 15.28 മീറ്റര്. മിന്നല് കുതിപ്പില് 2015ലെ കോഴിക്കോട് മീറ്റില് പഞ്ചാബിന്റെ ഹര്പ്രീത് സിങ് സ്ഥാപിച്ച 15.09 മീറ്ററിന്റെ റെക്കോര്ഡും പറളിയുടെ താരം മറികടന്നു.
കഴിഞ്ഞ സംസ്ഥാന മീറ്റില് ഒന്നാമതെത്തിയത് സഹപാഠിയായ എ. അജിത്തായിരുന്നു. പാലക്കാട് പിലാപ്പള്ളി മണ്ണൂട്ടിമഠത്തില് നാസറിന്റെയും റഹിയാനത്തിന്റെയും മകനാണ്. ഇത്തവണ ലോങ്ജമ്പില് വെള്ളിയും നേടിയിരുന്നു.
