തിരുവനന്തപുരം: കേരളത്തില് മാര്ക്സിസ്റ്റ് പാര്ട്ടിയുടെ നേതൃത്വത്തില് നടക്കുന്ന അക്രമങ്ങള്ക്കെതിരെ നടത്തുന്ന ദേശവ്യാപകമായ പ്രചാരണത്തിന്റെ ഭാഗമായി നവംബര് 11 ന് തിരുവനന്തപുരത്ത് എബിവിപി മഹാറാലി സംഘടപ്പിക്കും.
‘അഭിമാനമാണ് കേരളം, ഭീകരവും ദേശവിരുദ്ധവുമാണ് മാര്ക്സിസം’ എന്ന മുദ്രാവാക്യമുയര്ത്തി നടത്തുന്ന പരിപാടിയില് ഒരുലക്ഷം വിദ്യാര്ഥികള് പങ്കെടുക്കും. പിണറായി സര്ക്കാര് അധികാരത്തില് വന്നശേഷം 14 രാഷ്ട്രീയ കൊലപാതകങ്ങളാണ് കേരളത്തില് നടന്നത്. കേരളത്തിലെ കലാലയങ്ങളില് മറ്റു വിദ്യാര്ഥി സംഘടനകള്ക്ക് പ്രവര്ത്തിക്കാനുള്ള അവസരം നിഷേധിക്കുകയാണ് സിപിഎമ്മിന്റെ വിദ്യാര്ഥി വിഭാഗമായ എസ്എഫ്ഐ ചെയ്യുന്നത്.
കേരളത്തിലെ വിദ്യാര്ഥി സംഘടനാ പ്രവര്ത്തനത്തിന്റെ നിരോധനത്തിലേക്ക് കോടതിയെ കൊണ്ടെത്തിച്ചത് എസ്എഫ്ഐയുടെ അക്രമങ്ങളാണെന്ന് എബിവിപി ദേശീയ സെക്രട്ടറി ഒ. നിധീഷ് പറഞ്ഞു. 31 ന് മുഴുവന് സംസ്ഥാനങ്ങളുടെയും ജില്ലാ കേന്ദ്രത്തില് മാര്ക്സിസ്റ്റ് അക്രമവിരുദ്ധ പൊതുയോഗങ്ങളും മാര്ച്ചും സംഘടിപ്പിക്കും. കേരളത്തില് അന്ന് പതാകദിനവും 150 കേന്ദ്രങ്ങളില് നഗരതല കണ്വെന്ഷനും സംഘടിപ്പിക്കുമെന്നും അദ്ദേഹം പറഞ്ഞു. എബിവിപി സംസ്ഥാന സെക്രട്ടറി പി. ശ്യാംരാജും വാര്ത്താസമ്മേളനത്തില് പങ്കെടുത്തു.
