പാട്ന: രാജ്യത്തെ 20 സര്വ്വകലാശാലകള്ക്കായി 10,000 കോടി രൂപ അനുവദിക്കുമെന്ന് പ്രധാനമന്ത്രി നരേന്ദ്ര മോദി അറിയിച്ചു. പാട്ന സര്വ്വകലാശാലയുടെ ശതാബ്ദി ആഘോഷങ്ങള് ഉദ്ഘാടനം ചെയ്യുകയായിരുന്നു അദ്ദേഹം.
വരുന്ന അഞ്ച് വര്ഷത്തിനുള്ളില് രാജ്യത്തെ പത്ത് സ്വകാര്യ സര്വകലാശാലകള്ക്കും പത്ത് സര്ക്കാര് സര്വകലാശാലകള്ക്കുമായാണ് 10,000 കോടി രൂപ നല്കുക. ആഗോള നിലവാരത്തിലേയ്ക്ക് ഈ സര്വ്വകലാശാലകളെ ഉയര്ത്തുകയാണ് തന്റെ ലക്ഷ്യമെന്നും അദ്ദേഹം പറഞ്ഞു.
ലോകത്തിലെ മികച്ച 500 സര്വകലാശാലകള് പരിശോധിച്ചാല് അതില് ഇന്ത്യയിലെ ഒരെണ്ണം പോലുമില്ലെന്നുള്ളത് വളരെ ദുഃഖകരമാണ്. യോഗ്യരായ സര്വകലാശാലകളെ കണ്ടെത്താന് പുറത്തുനിന്നുള്ള ഏജന്സിയെ ചുമതലപ്പെടുത്തുമെന്നും പ്രധാനമന്ത്രി അറിയിച്ചു.
സര്ക്കാരിന്റെ നിയന്ത്രണങ്ങളില് നിന്ന് ഐഐഎമ്മുകളെ മോചിപ്പിക്കുന്നതിനുള്ള നടപടികള് സ്വീകരിക്കുമെന്ന് അദ്ദേഹം അറിയിച്ചു. സാധാരണ സര്വകലാശാലകള്ക്കുള്ള നിയന്ത്രണങ്ങള് നീക്കം ചെയ്യും. ലോകത്തിലെ മികച്ച 500 സര്വകലാശാലകളില് ഇന്ത്യയില് നിന്നുള്ളവയും ഇടം നേടണമെന്നാണ് തന്റെ ആഗ്രഹമെന്നും അദ്ദേഹം കൂട്ടിച്ചേര്ത്തു.
