ഇടുക്കി: കഞ്ഞിക്കുഴി പഞ്ചായത്തിനെ ആദര്ശ്ഗ്രാം പദ്ധതി പ്രകാരം ഇടുക്കി എം.പി. ജോയിസ് ജോര്ജ്ജ് ദത്തെടുത്തിട്ടും വികസന പദ്ധതികള് പഞ്ചായത്തില് എത്തിയില്ലെന്ന ആക്ഷേപം ശക്തമാകുകയാണ്. പഞ്ചായത്തിന്റെ മുഴുവന് വികസനപ്രവര്ത്തനങ്ങളും യാഥാര്ത്ഥ്യമാക്കുമെന്ന് പറഞ്ഞ് കൊട്ടിഘോഷിച്ച് നടത്തിയ പദ്ധതികളാണ് താളംതെറ്റിയിരിക്കുന്നത്.
പദ്ധതി ജനങ്ങളിലെത്തിക്കാനായി വെണ്മണിയില് നിന്നും ചേലച്ചുവട്ടിലേക്ക് കാല്നട ജാഥ നടത്തിയത് മാത്രമാണ് ജനങ്ങള്ക്ക് ഇപ്പോഴും ഓര്മയുള്ളത്. കേന്ദ്രാവിഷ്കൃത പദ്ധതികളായ പിഎംജിഎസ്വൈ, എന്ആര്എച്ച്എം തുടങ്ങി വിവിധ ഏജന്സികളില് നിന്നായിരിക്കും ആദര്ശ്ഗ്രാമിന് പണം അനുവദിക്കുന്നതെന്നാണ് പദ്ധതിനടത്തിപ്പുമായി ബന്ധപ്പെട്ട് ജോയിസ് ജോര്ജ് എംപി അറിയിച്ചത്.
പദ്ധതിയുടെ പ്രാരംഭപ്രവര്ത്തനത്തിനായി രണ്ടുലക്ഷം രൂപ പഞ്ചായത്ത് മാറ്റിവയ്ക്കണമെന്ന് എംപി കഞ്ഞിക്കുഴി പഞ്ചായത്തിനോട് നിര്ദ്ദേശിച്ചു. പഞ്ചായത്ത് ഭരണസമിതി ആദര്ശ്ഗ്രാമിന്റെ മാര്ഗ്ഗനിര്ദ്ദേശകരേഖകളനുസരിച്ച് 2 ലക്ഷം രൂപ മാറ്റിവയ്ക്കുകയും പദ്ധതിയുടെ സുഗമമായ നടത്തിപ്പിനായി ഒരു ഓഫീസ് തന്നെ തുറന്നുപ്രവര്ത്തിക്കുകയും ഓഫീസിന്റെ ചാര്ജ്ജ് ചുരുളി വാര്ഡ് മെമ്പറായ റോബിന് ജോസഫിനെ ഏല്പിക്കുകയും ചെയ്തതാണ്. ഇതുവരെ ഇതുമായി ബന്ധപ്പെട്ട് പണം അനുവദിക്കുന്നതിന് എംപി അനാസ്ഥ കാട്ടിയിരിക്കുകയാണ്. ആദര്ശ്ഗ്രാമിന്റെ ജില്ലാതല കമ്മറ്റി വിളിച്ചുകൂട്ടി വേണ്ടരീതിയില് പദ്ധതി നടപ്പിലാക്കാന് എംപി ശ്രമിച്ചില്ലെന്നാണ് ജനങ്ങള് ആരോപിക്കുന്നത്.
