ഉപ്പുതറ(കട്ടപ്പന): സപ്ലൈകോ സൂപ്പര് മാര്ക്കറ്റില് അവശ്യ സാധനങ്ങളില്ലാതെ ഉപഭോക്താക്കള് വലയുന്നു. ചുമട്ട് തൊഴിലാളികളുടെ കരാര് പുതുക്കാത്തതിലുള്ള പിടിവാശിയാണ് ഉപഭോക്താക്കളെ ദുരിതത്തിലാക്കിയത്. കിലോമീറ്റര് താണ്ടി ഇവിടെ എത്തുമ്പോള് വേണ്ട സാധനങ്ങള് ഒന്നുമില്ലാത്ത അവസ്ഥയാണിപ്പോള്. ചുമട്ട് തൊഴിലാളികളുടെ കരാര് കഴിഞ്ഞ ഏപ്രിലില് അവസാനിച്ചിരുന്നു. കരാര് പുതുക്കാത്തതില് പ്രതിഷേധിച്ച് തൊഴിലാളികള് സാധനം ഇറക്കാത്തതാണ് സാധനങ്ങള് എത്തിക്കാന് കഴിയാത്തതെന്നാണ് ഉദ്യോഗസ്ഥര് പറയുന്നത്. മൂന്ന് വര്ഷത്തിലൊരിക്കലാണ് ചുമട്ട് തൊഴിലാളികളുടെ കരാര് പുതുക്കുന്നത്.
15 ശതമാനം വര്ദ്ധനവാണ് സാധാരണ നല്കാറുള്ളത്. എന്നാല് ഉപ്പുതറയിലെ തൊഴിലാളികള് 20% കൂലി വര്ദ്ധനവും 27% ലെവിയും വര്ഷാവര്ഷം കരാറും ഉണ്ടാകണമെന്നാണ് ആവശ്യപ്പെട്ടത്. സിവില്സപ്ലൈസ് അധികൃതര് 20 % കൂലി വര്ദ്ധനവും 20% ലെവിയും നല്കാന് തയ്യാറായി ധാരണയായെങ്കിലും വര്ഷാവര്ഷ കരാര് പുതുക്കണമെന്ന ആവശ്യം അംഗീകരിച്ചില്ല. ഇത് കാരണം ചര്ച്ച അലസുകയും ഉപഭോക്താക്കള് ദുരിതത്തിലാവുകയും ചെയ്തു. കണ്ണംപടി – വളകോട് തുടങ്ങിയ ദൂരെ സ്ഥലങ്ങളില് നിന്നുമാണ് കൂടുതലും ഉപഭോക്താക്കള് സൂപ്പര്മാര്ക്കറ്റിലെത്തുന്നത്. പ്രശ്നപരിഹാരത്തിന് ശ്രമം നടക്കുന്നില്ല.
