തലശ്ശേരി: ധര്മ്മടം പഞ്ചായത്ത് ഭരണസമിതിയുടെ തീരുമാനപ്രകാരം വീടുകളില് നിന്നും ശേഖരിച്ചു സൂക്ഷിച്ച കെട്ടുകണക്കിന് മാലിന്യം നിര്ദ്ദിഷ്ട ബൈപ്പാസ് സ്ഥലത്ത് കുഴികുത്തി മൂടാനുള്ള നീക്കം വാര്ഡ് മെമ്പരുടെ നേതൃത്വത്തില് നാട്ടുകാര് തടഞ്ഞു. പാലയാട് ചിറക്കുനിയിലെ താല്ക്കാലിക മത്സ്യ മാര്ക്കറ്റിനും പൊതുകിണറിനും സമീപത്തായി ഇന്നലെ രാവിലെ രഹസ്യമായി ജെസിബി എത്തിച്ച് കുഴയെടുത്ത് മൂടിത്തുടങ്ങിയതോടെയാണ് പതിനേഴാം വാര്ഡ് മെമ്പര് സി.പി.അജിതയുടെ നേതൃത്വത്തില് തടഞ്ഞത്. കോണ്ഗ്രസ് നേതാക്കളായ കുന്നുമ്മല് ചന്ദ്രന്, പി.ടി.സനല്കുമാര്, സനോജ് പലേരി തുടങ്ങിയവരും സ്ഥലത്തെത്തിയതോടെ സ്ഥലത്ത് സംഘര്ഷാവസ്ഥയായി. ഇതോടെ ജെസിബിയുമായെത്തിയവര് പണി നിര്ത്തി. ജനദ്രോഹ നടപടിക്ക് നിര്ദ്ദേശം നല്കിയവര് സ്ഥലത്ത് വന്ന് നാട്ടുകാരോട് മാപ്പ് പറയണമെന്ന് ചന്ദ്രനും സനല്കുമാറും ആവശ്യപ്പെട്ടു. പഞ്ചായത്തിലെ 18 വാര്ഡുകളിലുമുള്ള വീടുകളില് നിന്നും 100 രൂപ വീതം വാങ്ങിയാണ് വീടുകളിലെ സകലമാന മാലിന്യങ്ങളും കുടുംബശ്രികള് മുഖേന പ്രത്യേക വാഹനത്തില് ശേഖരിച്ച് ബൈപ്പാസ് സ്ഥലത്ത് എത്തിച്ചത്. ഇത് പിന്നീട് കര്ണ്ണാടക മാണ്ഡ്യയിലേക്ക് കയറ്റി അയക്കുകയായിരുന്നു പതിവ്. ലോഡ് ഒന്നിന് 18,500 രൂപയാണ് ലോറിക്കാര് ഈടാക്കിയത്. ടൈല്സും മുടിയും ഒഴികെയുള്ള എന്തും ലോറിക്കാര് ഏറ്റെടുക്കുമായിരുന്നു. എന്നാല് ഈയ്യിടെയായി മാലിന്യം കടത്താന് ലോറിക്കാര് വിസമ്മതിച്ചത് വിനയായി. ഉദേശലക്ഷ്യം നടപ്പാക്കാനാവാത്തതോടെ ബൈപാസ് സ്ഥലത്ത് മാലിന്യമലതന്നെ രൂപപ്പെട്ടു. ഇത് തലവേദനയായതോടെയാണ് അവിടെ തന്നെ കുഴിച്ചുമൂടാനുള്ള ശ്രമം ഉണ്ടായത്. ദേശവാസികളുടെ എതിര്പ്പിനെത്തുടര്ന്ന് കുഴിച്ചുമൂടിയ മാലിന്യ കെട്ടുകള് ജെസിബി ഉപയോഗിച്ച് തന്നെ തിരിച്ചെടുപ്പിച്ചു. പ്രശ്നങ്ങള് ഒഴിവാക്കാന് പോലീസും സ്ഥലത്തെത്തിയിരുന്നു.
മാലിന്യനീക്കം തടസ്സപ്പെട്ടതോടെ ബൈപ്പാസില് മാലിന്യ മല കുഴിച്ചുമൂടാനുള്ള നീക്കം നാട്ടുകാര് തടഞ്ഞു
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.