കൊട്ടാരക്കര: ബിജെപി പ്രചരണയാത്രക്ക് നേരെ സിപിഎം അക്രമം. ഇന്നലെ വൈകിട്ട് 5 മണിയോടെ അമ്പലപ്പുറത്തിന് സമീപമാണ് സംഭവം. മഹിളാമോര്ച്ച പ്രവര്ത്തകര് സഞ്ചരിച്ചിരുന്ന വാഹനത്തിന് മുന്നില് മദ്യപിച്ച് കാറിലെത്തിയ സംഘം കാര് വാഹനത്തിന് കുറുകെയിട്ട് നിര്ത്തിയശേഷം വാഹനത്തില് കയറി പ്രവര്ത്തകരെ അസഭ്യം വിളിക്കുകയും ഫ്ളക്സ് ബോര്ഡുകള് കീറിയെറിയുകയും ചെയ്തു.
ഞങ്ങള് കമ്മ്യൂണിസ്റ്റുകാരാണന്നും ഞങ്ങള്ക്കെതിരെ ജാഥ നടത്താന് നീയൊന്നും വളന്നിട്ടില്ലന്നും ആക്രോശിച്ചായിരുന്നു ആക്രമണം. ബഹളം കേട്ട് പിറകില് ഉണ്ടായിരുന്ന പോലീസുകാര് ഓടിയെത്തി രണ്ട് പേരെ കസ്റ്റഡിയിലെടുത്ത് വാഹനത്തില് കയറ്റാന് ശ്രമിക്കുന്നതിനിടയില് ഒരാള് പോലീസിനെ ആക്രമിച്ച് ജീപ്പില് നിന്ന് ഇറങ്ങിയോടി. സംഭവം അറിഞ്ഞെത്തിയ ബിജെപി പ്രവര്ത്തകര് ഇയാളെ പിടികൂടി പോലീസില് ഏല്പ്പിച്ചു. ഇന്നലെ രാവിലെ മുതല് ബിജെപി മുനിസിപ്പല് സമിതിയുടെ നേതൃത്വത്തില് നഗരസഭാപരിധിയില് ജനരക്ഷായാത്രയുടെ പ്രചരണാര്ത്ഥം വാഹനജാഥ സംഘടിപ്പിച്ചിരുന്നു. ജാഥ അമ്പലപ്പുറത്ത് കൂടി കടന്നുപോയപ്പോഴാണ് സംഭവം. മണ്ഡലത്തിന്റെ പല ഭാഗങ്ങളില് വച്ചിരുന്ന ബോര്ഡുകള് കീറിയും മുമ്പും പ്രകോപനത്തിന് ശ്രമം ഉണ്ടായിരുന്നു.
