ന്യൂദല്ഹി: ഐആര്സിടിസി ഹോട്ടല് കുംഭകോണവുമായി ബന്ധപ്പെട്ട് മുന് റെയില്വേമന്ത്രിയും ആര്ജെഡി തലവനുമായ ലാലുപ്രസാദ് യാദവിനെ സിബിഐ ചോദ്യം ചെയ്തു. ചോദ്യം ചെയ്യലിന് ഹാജരാകുവാന് സിബിഐ ആവശ്യപ്പെട്ടിരുന്നു. ഇതിനെത്തുടര്ന്നാണ് ലാലു സിബിഐ ആസ്ഥാനത്തെത്തിയത്. മകള് മിസക്കൊപ്പമാണ് ലാലു കഴിഞ്ഞദിവസം സിബിഐ ആസ്ഥാനത്തെത്തിയത്.
ഉദ്യോഗസ്ഥര് മിസയോട് പുറത്ത് കാത്തിരിക്കാനായി ആവശ്യപ്പെട്ടു. ലാലുവിന്റെ മകനും മുന് ബീഹാര് ഉപമുഖ്യമന്ത്രിയുമായ തേജ്വസി യാദവിനെയും ചോദ്യം ചെയ്യും.
2006ല് രണ്ട് ഐആര്സിടിസി ഹോട്ടലുകളുടെ പുനരുദ്ധാരണവുമായി ബന്ധപ്പെട്ടാണ് കുംഭകോണം നടന്നത്. ഐആര്സിടിസി ഏറ്റെടുത്ത റാഞ്ചി, പുരി എന്നിവിടങ്ങളിലെ ഹോട്ടലുകളുടെ വികസനത്തിനും നടത്തിപ്പിനുമായി ലേലത്തിലൂടെ കമ്പനികളെ ക്ഷണിച്ചിരുന്നു.
സുജാത ഹോട്ടല്പ്രൈവറ്റ് ലിമിറ്റഡ് എന്ന കമ്പനിക്ക് കരാര് നല്കിയതിന് പാരിതോഷികമായി, ലാലുവിന്റെ സഹായി പ്രേം ചന്ദ് ഗുപ്ത രണ്ട് ഏക്കര് ഭൂമി കൈപ്പറ്റിയെന്നാണ് ആരോപണം.
