മമ്പറം: കേരളത്തിലെ ബിജെപി പ്രവര്ത്തകര് പതിറ്റാണ്ടുകളായി അഭിപ്രായ സ്വാതന്ത്ര്യത്തിനും പ്രവര്ത്തന സ്വാതന്ത്ര്യത്തിനും വേണ്ടി വലിയ ത്യാഗോജ്വല സമരങ്ങളാണ് നടത്തുന്നതെന്ന് ബിജെപി ദേശീയ ജനറല് സെക്രട്ടറി അരുണ്സിംഗ് പറഞ്ഞു. കേരളത്തില് കാലങ്ങളായി നടക്കുന്ന കൊലപാതക രാഷ്ട്രീയത്തിന് അറുതി വരുത്തേണ്ടതുണ്ടെന്നും അദ്ദേഹം പറഞ്ഞു. ജനരക്ഷാ യാത്രയുടെ മൂന്നാം ദിവസത്തെ ഉദ്ഘാടനം മമ്പറത്ത് നിര്വഹിക്കുകയായിരുന്നു അദ്ദേഹം. കേരളത്തില് നടക്കുന്ന രാഷ്ട്രീയ കൊലപാതകങ്ങള് മനുഷ്യ മനസാക്ഷിയെ ഞെട്ടിക്കുന്നതാണ്. സിപിഎം ഭരണത്തില് വന്നതിന് ശേഷം പിണറായി വിജയന്റെ മണ്ഡലത്തില്ത്തന്നെ നാലോളം അരുംകൊലകള് നടത്തിക്കഴിഞ്ഞു. കൊലപാതകികളെ സംരക്ഷിക്കുന്ന നയമാണ് സംസ്ഥാന സര്ക്കാര് അനുവര്ത്തിക്കുന്നത്. ഇതു നിര്ത്തിയേ പറ്റൂ.
കേരളത്തിലെ ബിജെപി പ്രവര്ത്തകര്ക്ക് ആശയ സ്വതന്ത്ര്യത്തിനു വേണ്ടിയുള്ള ജനരക്ഷ യാത്ര നയിക്കുന്നത് ഋഷി തുല്യനായ കുമ്മനം രാജശേഖരനാണ്. കുമ്മനം രാജശേഖരന്റെ ഈ യാത്രക്ക് ഭാരതത്തിലെ 11 കോടി ബിജെപി പ്രവര്ത്തകരുടേയും ജനാധിപത്യവിശ്വാസികളായ മുഴുവന് ഭാരതീയരുടേയും പിന്തുണ അര്പ്പിക്കാനാണ് ബിജെപി നേതൃത്വം തന്നെ ഇങ്ങോട്ട് വിട്ടിരിക്കുന്നതെന്നും വരും ദിവസങ്ങളില് ഈ സമരം കേരളം മുഴുവന് പടര്ന്നുപിടിക്കുന്ന ഒരു സമരജ്വാലയായി മാറുമെന്നും ബിജെപി ദേശീയ ജനറല് സെക്രട്ടറി അരുണ് സിംഗ് പറഞ്ഞു.
