രാജാക്കാട്: വനവാസികള്ക്കായി സര്ക്കാര് പദ്ധതികള് നടപ്പിലാക്കുമ്പോഴും ഗതാഗതയോഗ്യമായ റോഡില്ലാത്തതിനാല് ദുരിതമനുഭവിക്കുകയാണ് വട്ടവട പഞ്ചായത്തിലെ വലസിപ്പെട്ടിക്കുടി നിവാസികള്. വിദ്യാര്ത്ഥികളടക്കം പതിനഞ്ച് കിലോമീറ്ററോളം കാട്ടുപാതയിലൂടെ കാല്നടയായി സഞ്ചരിക്കേണ്ട ഗതികേടിലാണ്.
വട്ടവടയില് നിന്നും ഇരുപത് കിലോമീറ്റര് അകലെയുള്ള വലസിപ്പെട്ടിക്കുടിയിലേയ്ക്കുള്ള റോഡാണിത്. ജീപ്പുകള് മാത്രം കടന്നുപോകുന്ന ഈ റോഡിലുടെ വാഹനത്തില് സഞ്ചരിച്ചാലും രണ്ട് മണിക്കൂറോളം വേണം കുടിയിലെത്തുവാന്. ആശുപത്രി ആവശ്യങ്ങളടക്കം പുറം ലോകവുമായി കുടിനിവാസികള്ക്ക് ബന്ധപെടുന്നതിനുള്ള ഏകറോഡാണിത്. റോഡിലൂടെ കാല്നട സാധ്യമാകാത്തതിനാല് വിദ്യാര്ത്ഥികള് കാട്ടുപാതയിലൂടെയാണ് യാത്രചെയ്യുന്നത്. മഴയും കാറ്റും ശക്തമാകുന്ന സമയത്ത് ഇതുവഴി യാത്ര ചെയ്യാന് പറ്റാത്തതിനാല് അദ്ധ്യയന വര്ഷത്തില് പകുതിപോലും കുട്ടികള്ക്ക് സ്കൂളില് എത്തുവാന് കഴിയാത്ത സാഹചര്യമാണുള്ളത്.
വന്യമൃഗങ്ങളടക്കമുള്ള കാട്ടുപാതയിലൂടെ സഞ്ചരിക്കുന്നതിന് വലിയ ബുദ്ധിമുട്ടാണ് അനുഭവിക്കുന്നതെന്ന് വിദ്യാര്ത്ഥികളും പറയുന്നു. തിരഞ്ഞെടുപ്പ് കാലത്ത് മാത്രം കാട്ടുപാതകള് താണ്ടി വാഗ്ദാനങ്ങളുമായി പലരും കുടിയിലേയ്ക്ക് എത്തും. പിന്നീട് ആരും ഇവിടേയ്ക്ക് എത്താറില്ല. സഞ്ചാരയോഗ്യമായ റോഡ് ഇവരുടെ സ്വപ്നമാണ്.
