പയ്യന്നൂര്: ജിഹാദി-ചുവപ്പ് ഭീകരതക്കെതിരെ ബിജെപി സംസ്ഥാന അധ്യക്ഷന് കുമ്മനം രാജശേഖരന് നയിക്കുന്ന ജനരക്ഷായാത്രയില് പ്രവര്ത്തകരോടൊപ്പം പാര്ട്ടി ദേശീയ അധ്യക്ഷന് അമിത്ഷായും. പയ്യന്നൂര് മുതല് പരിപാടിയുടെ സമാപനസമ്മേളനം നടക്കുന്ന പിലാത്തറ വരെയാണ് അദ്ദേഹം പ്രവര്ത്തകരോടൊപ്പം നടന്നത്.
പരിപാടിയുടെ തുടക്കം മുതല് ഒടുക്കം വരെ ആവേശത്തോടെ മുദ്രാവാക്യം മുഴക്കി അമിത് ഷായും പ്രവര്ത്തകര്ക്കൊപ്പമുണ്ടായിരുന്നു. അമിത്ഷായുടെ യാത്രയോടനുബന്ധിച്ച് പയ്യന്നൂരില് കനത്ത സുരക്ഷയൊരുക്കിയിരുന്നു. എന്നാല് എല്ലാ സുരക്ഷാമാനദണ്ഡങ്ങളെയും മറികടന്ന് അദ്ദേഹം പ്രവര്ത്തകര്ക്കൊപ്പം അണിചേരുകയായിരുന്നു.
ജനരക്ഷായാത്രയുടെ ആദ്യദിനം യാത്രയില് പങ്കെടുക്കാന് പതിനായിരങ്ങളാണ് എത്തിച്ചേര്ന്നത്. പയ്യന്നൂരിലും പരിസരപ്രദേശങ്ങളിലുമുള്ള നൂറുകണക്കിന് പ്രവര്ത്തകര് രാവിലെ മുതല് തന്നെ പയ്യന്നൂരിലെത്തിച്ചേര്ന്നിരുന്നു. ഹരിതകുങ്കുമ പതാകയുമേന്തി മുദ്രാവാക്യം വിളികളുമായി പ്രവര്ത്തകര് രാവിലെ മുതല് തന്നെ നഗരം കീഴടക്കി.
ഉദ്ഘാടന പരിപാടി നടക്കുന്ന പയ്യന്നൂര് പഴയ ബസ് സ്റ്റാന്റ് പരിസരം ഉദ്ഘാടന പരിപാടി ആരംഭിക്കുന്നതിന് മുമ്പ് തന്നെ നിറഞ്ഞ് കവിഞ്ഞിരുന്നു. ജനനായകന് അമിത് ഷാ വേദിയിലെത്തുമ്പോള് പയ്യന്നൂര് അക്ഷരാര്ത്ഥത്തില് ആര്ത്തിരമ്പുകയായിരുന്നു.
ദിഗന്തങ്ങള് മുഴങ്ങുമാറുച്ചത്തില് മുദ്രാവാക്യം വിളികളോടെയാണ് പ്രവര്ത്തകര് അദ്ദേഹത്തെ സ്വാഗതം ചെയ്തത്. ഹരിയാന, കര്ണ്ണാടക തുടങ്ങി വിവിധ സംസ്ഥാനങ്ങളില് നിന്നും നൂറുകണക്കിന് സംഘപരിവാര് പ്രവര്ത്തകരും ഇന്നലെ യാത്രയിലും ഉദ്ഘാടന ചടങ്ങിലും പങ്കുകൊണ്ടു.
