കൊച്ചി: നടിയെ ആക്രമിച്ച കേസില് നടന് ദിലീപിന് ജാമ്യം. കര്ശന ഉപാധികളോടെ ഹൈക്കോടതിയാണ് ജാമ്യം അനുവദിച്ചത്. ഒരു ലക്ഷം രൂപ ബോണ്ടായി നല്കണം. കേസില് റിമാന്റില് കഴിയുന്ന ദിലീപ് 85 ദിവസങ്ങള്ക്ക് ശേഷമാണ് പുറത്തിറങ്ങുന്നത്.
സാക്ഷികളെ സ്വാധീനിക്കരുത്, പാസ് പോര്ട്ട് കെട്ടിവയ്ക്കണം, അന്വേഷണ ഉദ്യോഗസ്ഥര് ആവശ്യപ്പെടുമ്പോള് ഹാജരാകണം, തെളിവുകള് നശിപ്പിക്കരുത് തുടങ്ങിയ ഉപാധികളാണ് ഹൈക്കോടതി ജാമ്യം അനുവദിച്ചത്.
കഴിഞ്ഞ മാസം 27 ന് ഹര്ജിയില് വാദം പൂര്ത്തിയായതിനെ തുടര്ന്ന് വിധി പറയാനായി ഇന്നത്തേക്ക് മാറ്റുകയായിരുന്നു. നേരത്തെ രണ്ട് തവണ ദിലീപിന്റെ ജാമ്യഹര്ജി ഹൈക്കോടതി തള്ളിയിരുന്നു. ദിലീപിനെതിരെ കൂടുതല് ആരോപണങ്ങള് ഉന്നയിച്ചാണ് പ്രോസിക്യൂഷന് ഇത്തവണ ജാമ്യഹര്ജിയെ എതിര്ത്തത്.
നടിയെ ആക്രമിക്കാന് ദിലീപ് പള്സര് സുനിക്ക് ഒന്നരക്കോടി രൂപയുടെ ക്വട്ടേഷനാണ് നല്കിയതെന്ന് പ്രോസിക്യൂഷന് പറഞ്ഞു. പോലീസ് പിടിച്ചാല് മൂന്ന് കോടി നല്കാമെന്നായിരുന്നു വാഗ്ദാനം. ക്വട്ടേഷനിലൂടെ ദിലീപിന് 65 കോടി രൂപയുടെ നേട്ടം ഉണ്ടാകുമായിരുന്നെന്നും പ്രോസിക്യൂഷന് ചൂണ്ടിക്കാട്ടി. സുനിയുടെ സഹതടവുകാരനായിരുന്ന വിപിന് ലാലിന്റെ മൊഴി ചൂണ്ടിക്കാട്ടിയായിരുന്നു പ്രോസിക്യൂഷന്റെ വാദങ്ങള്. മൊഴിപ്പകര്പ്പ് പ്രോസിക്യൂഷന് കോടതിയില് വായിച്ചു.
പ്രോസിക്യൂഷനെതിരെ ഗുരുതരമായ ആരോപണങ്ങള് ഉയര്ത്തിയായിരുന്നു ദിലീപിന്റെ അഭിഭാഷകന് ജാമ്യത്തിനായി വാദിച്ചത്. കേസ് അന്വേഷണത്തിന്റെ ഒരു വിവരങ്ങളും പോലീസ് തന്റെ കക്ഷിയെ അറിയിക്കുന്നില്ലെന്ന് ദിലീപിന് വേണ്ടി ഹാജരായ ബി.രാമന് പിള്ള പറഞ്ഞു. റിമാന്റ് റിപ്പോര്ട്ടില് പോലും പൊലീസ് ഒരു വിവരവും രേഖപ്പെടുത്തുന്നില്ല. തന്റെ പേരിലുള്ള കുറ്റങ്ങള് അറിയാനുള്ള അവകാശം പോലും ദിലീപിന് നിഷേധിക്കുകയാണെന്ന് അഭിഭാഷകന് വാദിച്ചു.
കോടതി നിര്ദേശിക്കുന്ന ഏതു വ്യവസ്ഥയും അംഗീകരിക്കാന് തയാറാണെന്ന് ദിലീപിന് വേണ്ടി അഭിഭാഷകന് കോടതിയില് വ്യക്തമാക്കിയിരുന്നു.
