കൊല്ലം: മണലില്, അരിയില്, പിന്നെ നാവിന് തുമ്പില് ഹരിശ്രീ കുറിച്ച് അക്ഷരപ്പിച്ച വെച്ച് ആയിരങ്ങള്… ജില്ലയിലെ എല്ലാ ക്ഷേത്രാങ്കണങ്ങളിലും ആദ്യക്ഷരത്തിന്റെ അമൃത് നുകരാനെത്തിയ കുരുന്നുകളുടെയും അച്ഛനമ്മമാരുടെയും തിരക്കായിരുന്നു. വായനശാലകളിലും പ്രത്യേക സംവിധാനമൊരുക്കിയിരുന്നു. ക്ഷേത്രങ്ങളില് വിദ്യാഗോപാലമന്ത്രാര്ച്ചനയും പ്രത്യേക പൂജകളും നടന്നു. സാംസ്കാരികപ്രവര്ത്തകര്, അദ്ധ്യാപകര് തുടങ്ങി വിവിധ തുറകളിലെ പ്രമുഖര് കുഞ്ഞുങ്ങള്ക്ക് അക്ഷരമധുരം പകര്ന്നു. കൊല്ലം പുതിയകാവ്, ആനന്ദവല്ലീശ്വരം, പട്ടത്താനം ശ്രീകൃഷ്ണസ്വാമി ക്ഷേത്രം, അഞ്ചല് പനയഞ്ചേരി സുകൃതം ബാലാശ്രമം, കരവാളൂര് പീഠികാ ഭഗവതി ക്ഷേത്രം തുടങ്ങി നൂറുകണക്കിന് കേന്ദ്രങ്ങളില് വിദ്യാരംഭചടങ്ങുകള് നടന്നു.
ഉമയനല്ലൂര് നേതാജി മെമ്മോറിയല് ലൈബ്രറിയില് വിദ്യാരംഭചടങ്ങുകള് നടന്നു. പ്രശസ്ത സംഗീതജ്ഞന് ഉമയനല്ലൂര് പി.കെ. ഗോവിന്ദരാജ് കുരുന്നുകള്ക്ക് ആദ്യക്ഷരം പകര്ന്നു നല്കി.
ചാത്തന്നൂര് കാഞ്ഞിരംവിള ക്ഷേത്രത്തില് നടന്ന വിദ്യാരംഭത്തില് ജില്ലാ പിഎസ്സി ഓഫിസര് രാജന്കരൂര് കുട്ടികളെ എഴുത്തിനിരുത്തി. ക്ഷേത്രം ഭാരവാഹികളായ പ്രസിഡന്റ് പി.ബിജുലാല്, ബിജുകൊച്ചമ്പനാട്, അനന്തറാം, നടരാജന് എന്നിവര് നേതൃത്വം നല്കി
