കണ്ണൂര്: തളിപ്പറമ്പ് കീഴാറ്റൂരില് നെല് വയല് നികത്തി ദേശീയപാത ബൈപ്പാസ് നിര്മ്മിക്കാന് തത്ക്കാലം വിജ്ഞാപനമിറക്കില്ലെന്ന് മന്ത്രി ജി.സുധാകരന്. നെല് വയല് നികത്തി ദേശീയപാത നിര്മ്മിക്കാനുളള നീക്കത്തില് പ്രതിഷേധിച്ച് സമരം നടത്തുന്ന വയല്ക്കിളി കൂട്ടായ്മയിലെ പ്രതിനിധികളെ പങ്കെടുപ്പിച്ചു കൊണ്ട് ഇന്നലെ തിരുവനന്തപുരത്ത് നടന്ന ചര്ച്ചയിലാണ് തീരുമാനം മന്ത്രി അറിയിച്ചത്. വയല് ഒഴിവാക്കിക്കൊണ്ടുളള സാധ്യത പരിശോധിക്കുമെന്നും വയല് ഏറ്റെടുക്കുന്നത് സംബന്ധിച്ച് വിജ്ഞാപനം ഇറക്കില്ലെന്നും മന്ത്രി സമര നേതാക്കളെ അറിയിച്ചു. മന്ത്രിയുടെ ഉറപ്പിന്റെ പശ്ചാത്തലത്തില് കഴിഞ്ഞ ഇരുപത് ദിവസത്തോളമായി നാട്ടുകാര് നടത്തി വരുന്ന സത്യഗ്രഹ സമരം അവസാനിപ്പിക്കുന്നത് സംബന്ധിച്ച് ഇന്ന് രാവിലെ 10 മണിക്ക് കീഴാറ്റൂരില് ചേരുന്ന വയല്ക്കിളി കൂട്ടായ്മയുടേയും നാട്ടുകാരുടേയും യോഗം തീരുമാനമെടുക്കുമെന്ന് സമര സമിതി നേതാവ് സുരേഷ് കീഴാറ്റൂര് ജന്മഭൂമിയോട് പറഞ്ഞു.
വയല് സംരക്ഷിക്കണമെന്ന മന്ത്രിയുടെ നിലപാട് അംഗീകരിക്കുന്നതായും അദ്ദേഹം പറഞ്ഞു. നോട്ടിഫിക്കേഷന് മാറ്റുന്നത് സ്വാഗതാര്ഹമാണ്. വീണ്ടും വിജ്ഞാപനമിറക്കിയാല് ശക്തമായ സമരം തുടരുമെന്ന് പ്രതിനിധികള് മുന്നറിയിപ്പ് നല്കി. സെക്രട്ടേറിയറ്റിലെ മന്ത്രിയുടെ ചേംബറില് നടന്ന ചര്ച്ചയില് തളിപ്പറമ്പ് എം.എല്എ ജെയിംസ് മാത്യു, പി.ജയരാജന്, ദേശീയപാത അതോറിറ്റി റീജണല് ഓഫീസര് തുടങ്ങിയവര് പങ്കെടുത്തു.
