കൊല്ലം: ജനജീവിതം ദുരിതപൂര്ണമാക്കിയ കെഎംഎംഎല് നടപടികള്ക്കെതിരെ ചെന്നൈ നാഷണല് ഗ്രീന് ട്രൈബ്യൂണല് സൗത്ത് സോണില് നല്കിയ പൊതു താല്പര്യ ഹര്ജിയില് അനുകൂല വിധി ഉണ്ടായതായി പൊല്യൂട്ടഡ് ഏരിയാ വെല്ഫെയര് സൊസൈറ്റി ഭാരവാഹികള് പത്രസമ്മേളനത്തില് അറിയിച്ചു. പരിസരവാസികള്ക്ക് ശുദ്ധജലം നല്കാന് കമ്പനി ബാദ്ധ്യസ്ഥമാണെന്നും പരിഹാരങ്ങള് സമയബന്ധിതമായി നടപ്പാക്കണമെന്നും ട്രിബ്യൂണല് നിര്ദ്ദേശിച്ചു. ജലസ്രോതസ്സുകള് മുന്പുണ്ടായിരുന്ന അവസ്ഥയിലെത്തുന്നതുവരേയും കമ്പനി ജനങ്ങള്ക്ക് ശുദ്ധജല വിതരണം തുടരണം. വീഴ്ച വരുത്തിയാല് പൊല്യൂഷന് കണ്ട്രോള് ബോര്ഡ് കമ്പനി നിര്ത്തനുള്ള ഉത്തരവ് നല്കണമെന്നും നിര്ദേശം നല്കി.
മലിനീകരണം മൂലം ദുരിതമനുഭവിക്കുന്നവര്ക്ക് നാഷണല് ഗ്രീന് ട്രിബ്യൂണല് ആക്ട് അനുസരിച്ചുള്ള നഷ്ടപരിഹാരത്തിന് അര്ഹത ഉണ്ടെന്ന് ട്രിബ്യൂണല് കണ്ടെത്തി. നഷ്ടപരിഹാരത്തിലേക്കായി ഒരു കോടി രൂപയുടെ ഒരു ഫണ്ട് കെഎംഎംഎല് ഡെപ്പോസിറ്റ് ചെയ്യണമെന്നും അതിന്റെ വിനിയോഗം ചീഫ് സെക്രട്ടറിയും കെഎസ്പിസിബി ചെയര്മാനും ചേര്ന്ന് നിര്വഹിക്കണമെന്നുമാണ് നിര്ദേശം.
കെഎംഎംഎലിന്റെ പ്രവര്ത്തനാരംഭം മുതല്ക്കു തന്നെ കമ്പനിയുടെ വടക്കുഭാഗത്തും തുടര്ന്ന് വടക്കു പടിഞ്ഞാറും പടിഞ്ഞാറു ഭാഗത്തും താമസിക്കുന്നവരുടെ ജീവിതം ദുരിതപൂര്ണമാണ്. രാസമാലിന്യം സംഭരിച്ച് സംസ്ക്കരിക്കുന്നതിലേക്കായി നിര്മ്മിച്ച പോണ്ടുകളുടെ നിര്മ്മാണത്തിലുണ്ടായ സാമ്പത്തിക അഴിമതിയുടെ പരിണിത ഫലമാണീ ദുരന്തത്തിനടിസ്ഥാനമെന്ന് സൊസൈറ്റി ഭാരവാഹികള് പറഞ്ഞു.
മാലിന്യ സംഭരണികളില് നിന്നും ഊര്ന്നിറങ്ങിയും അവ പൊട്ടിച്ചു വിട്ടും പരിസരത്തെ ജലസ്രോതസ്സുകളും കൃഷികളും നശിച്ചപ്പോള് മുതല്ക്കു തന്നെ ആ ദുരിതങ്ങള്ക്കിരയായവര് പരാതി നല്കുകയും അധികാര കേന്ദ്രങ്ങളുടെ ശ്രദ്ധയില്പ്പെടുത്തുവാന് സമരം നടത്തുകയും ചെയ്തിരുന്നു. ഈ പ്രദേശം മാലിന്യ പൂരിതമാണെന്നും ഇവിടെ വസിക്കുന്നവര്ക്ക് മാലിന്യം സൃഷ്ടിച്ചവര് നഷ്ടപരിഹാരം നല്കണമെന്നും മലിനങ്ങളായിടങ്ങള് പൂര്വ്വ സ്ഥിതിയിലാകുംവരെ രോഗചികിത്സയ്ക്കും ശുദ്ധജല വിതരണത്തിനും കമ്പനി ബാദ്ധ്യസ്ഥമാണെന്ന ഒരുത്തരവാണ് എന്ജിടി ചെന്നൈ പുറപ്പെടുവിച്ചിട്ടുള്ളത്.
പാസ് പ്രസിഡന്റ് വി.വിദ്യാധരന്, സെക്രട്ടറി ഡി.സുരേഷ്കുമാര്, വൈസ് പ്രസിഡന്റ് പി.ശശിധരന് പിള്ള, ജോയിന്റ് സെക്രട്ടറി കെ.രാജേന്ദ്രന്, ആര്.മുകുന്ദന് പിള്ള എന്നിവര് പത്രസമ്മേളനത്തില് പങ്കെടുത്തു.
