ബെംഗളൂരു: കൂട്ടുകാര്‍ സെല്‍ഫിയെടുക്കുന്ന തിരക്കിലായിരുന്നു. തൊട്ടരികെ അവരുടെ ഉറ്റതോഴന്‍ വെള്ളത്തില്‍ മുങ്ങുന്നത് അവര്‍ അറിഞ്ഞതേയില്ല. ബെംഗളൂരുവിലാണ് സംഭവം.ജയനഗര്‍ നാഷണല്‍ കോളേജ് വിദ്യാര്‍ഥി ജി. വിശ്വാസാണ്(17) മരിച്ചത്.
എന്‍സിസി കേഡറ്റായ ഒന്നാം വര്‍ഷ പ്രീ യൂണിവേഴ്‌സിറ്റി വിദ്യാര്‍ഥി വിശ്വാസ് മറ്റു കേഡറ്റുകള്‍ക്കൊപ്പം കനകപുരയില്‍ വിനോദ സഞ്ചാരത്തിനു പോയതാണ്. കൂട്ടുകാര്‍ ഒരു കുളത്തില്‍ നീന്താനിറങ്ങി. അവര്‍ മാറി മാറി സെല്‍ഫിയെടുത്ത് രസിച്ചു, അതിനിടെ വിശ്വാസ് വെള്ളത്തില്‍ മുങ്ങുന്നത് അവര്‍ കണ്ടതുമില്ല.
സെല്‍ഫി ചിത്രങ്ങളില്‍ ഒന്നില്‍ അവന്‍ വെള്ളത്തില്‍ മുങ്ങുന്നത് കാണാം. കുളി കഴിഞ്ഞ് അടുത്തുള്ള അമ്പലത്തിലേക്ക് പോയപ്പോഴും അവര്‍ വിശ്വാസിന്റെ അസാന്നിധ്യം ശ്രദ്ധിച്ചില്ല. ക്ഷേത്രത്തില്‍ കയറും മുന്‍പ് ഒരാള്‍ സെല്‍ഫി ചിത്രങ്ങള്‍ കണ്ടു നോക്കിയപ്പോഴാണ് കൂട്ടുകാരന്‍ മുങ്ങിത്താഴുന്ന ചിത്രം കണ്ടത്.
അലറിക്കരഞ്ഞ അവന്‍ മറ്റുള്ളവരെ അറിയിച്ചു. സ്ഥലത്ത് മടങ്ങിയെത്തി മണിക്കൂറുകള്‍ തെരച്ചില്‍ നടത്തി മൃതദേഹം കണ്ടെടുക്കുകയായിരുന്നു. ഓട്ടോ ഡ്രൈവര്‍ ഗോവിന്ദരാജുവിന്റെ മകനാണ് വിശ്വാസ്. സെല്‍ഫിക്കിടെ കൊക്കയില്‍ വീണും ട്രെയിനിനടിയില്‍ പെട്ടും മരിക്കുന്നവര്‍ ഇന്ന് ധാരാളമാണ്. സെല്‍ഫി ഭ്രമം പലപ്പോഴും വലിയ ആപത്തിനാണ് വഴിവെയ്‌ക്കുന്നത്.
