യാദവന്മാരില്‍വച്ച് വാസുദേവന്‍-വാസുദേവന്റെ പുത്രനാണ് ശ്രേഷ്ഠന്‍. ശ്രീകൃഷ്ണനും ബലരാമനും വസുദേവന്റെ പുത്രനാകായാല്‍ വാസുദേവന്മാര്‍ തന്നെയാകയാല്‍ ‘ഞാന്‍ തന്നെയാണ് എന്റെ വിഭൂതി എന്ന് പറയുന്നത് നിരര്‍ത്ഥകമാണ്. കൃഷ്ണന്‍ പരബ്രഹ്മവും സര്‍വ്വദേവേശ്വരനുമാണല്ലോ. ബലരാമനെയാണ് ഭഗവാന്‍ എന്റെ വിഭൂതിയെന്ന് പറയുന്നത്.
മാത്രമല്ല, ബലരാമന് പരിപൂര്‍ണജ്ഞാനവും ഇല്ല എന്നാണ് ഭാഗവതം പറയുന്നത്.
ബ്രഹ്മമോഹനം എന്ന ഒരു കൊല്ലക്കാലം ഭഗവാന്‍ ശ്രീകൃഷ്ണന്‍ തന്നെ പശുക്കുട്ടികളാലും ഗോപബാലന്മാരുമായി രൂപാന്തരങ്ങള്‍ സ്വീകരിച്ച് വൃന്ദാവനത്തിലും ഗോകുലത്തിലും വിഹരിച്ചുവല്ലോ. തള്ളപ്പശുക്കള്‍ക്കോ ബാലന്മാരുടെ അമ്മമാര്‍ക്കോ ഇക്കാര്യം അറിയാന്‍ കഴിഞ്ഞില്ല. അതുപോലെ ബലരാമനും കഴിഞ്ഞില്ല. കൊല്ലം തികയുന്നതിന് രണ്ടോ മൂന്നോ ദിവസം മുമ്പ് മാത്രമാണ് അറിയുന്നത്. നാരായണീയത്തില്‍ ശ്രീമേല്‍പ്പത്തൂര്‍ ഭട്ടതിരിപ്പാട് ഇക്കാര്യം ഉദ്ധരിച്ചുകൊണ്ടു പറയുന്നത് നമുക്ക് ശ്രദ്ധിക്കാം.
”ത്വാമഗ്രജോപി ബുബുധേകില വത്സരാന്തേ
ബ്രഹ്മാത്മനോരപി മഹാന്‍ യുവയോര്‍ വിശേഷഃ”
(അങ്ങയുടെ ജ്യേഷ്ഠന് കൊല്ലാവസാനത്തില്‍ മാത്രമാണത്രേ ഇക്കാര്യം അറിഞ്ഞത്. നിങ്ങള്‍ രണ്ടുപേരും ബ്രഹ്മസ്വരൂപികളാണെങ്കിലും അങ്ങേയറ്റം ജ്ഞാനവും ഐശ്വര്യവും വളരെ കൂടുതലുണ്ട്-മഹാന്‍)
പാണ്ഡവാനാം ധനഞ്ജയഃ അസ്മി (69)
പാണ്ഡുവിന്റെ പുത്രന്മാരായിട്ട് നിങ്ങള്‍ അഞ്ചുപേരുണ്ടല്ലോ. അവരില്‍ വച്ച് എന്റെ സുഹൃത്തും സഖാവുമായ ധനഞ്ജയനാണ് ശ്രേഷ്ഠന്‍. എന്റെ വിഭൂതിയും അവനാണ്. അതായത്, അര്‍ജുനാ, നീ തന്നെയാണ് എന്റെ വിഭൂതി. നീ അദ്ഭുതപ്പെടേണ്ട! നിനക്ക് അച്ഛന്‍ വിളിച്ച പേര് കൃഷ്ണന്‍ എന്നല്ലേ? എന്റെ പേരും കൃഷ്ണന്‍ എന്നാണല്ലോ. ഇതാണ് നമ്മളുടെ സമത്വം. യുധിഷ്ഠിരന്റെ രാജസൂയയാഗത്തിനുവേണ്ടി രാജാക്കന്മാരെ ജയിച്ച് അവരില്‍നിന്ന് ധാരാളം ധനം സ്വീകരിച്ച് ജ്യേഷ്ഠന് സമര്‍പ്പിച്ചപ്പോള്‍ നിനക്ക് ധനഞ്ജയന്‍ എന്ന പേരു സിദ്ധിച്ചു. ഞാന്‍ നിന്റെ ഒന്നിച്ച് ഉണ്ടായിരുന്നതുകൊണ്ടാണ് നിനക്ക് അക്കാര്യം സാധിച്ചത്.
