കോട്ടയം: ഗതാഗത കുരുക്കിനിടയിലൂടെ നിരങ്ങിനീങ്ങിയ ബൈക്ക് ടിവൈഡറില് തട്ടിയുണ്ടായ അപകടത്തില് ബൈക്ക് യാത്രികന് മരിച്ചു. പിന്നാലെ എത്തിയ ടിപ്പര്ലോറി തലയിലൂടെ കയറിയിറങ്ങിയാണ് മരണം.
ഇന്നലെ രാവിലെ ഏഴരയോടെ നാഗമ്പടത്ത് പുതുതായി പണിയുന്ന റെയില്വേ മോല്പ്പാലത്തിന് സമീപമാണ് അപകടം നടന്നത്. ഏറ്റുമാനൂര് പേരൂര് വെച്ചൂക്കവല മണ്ഡപത്തില് ജോബി ജോസഫ് (40)ആണ് മരിച്ചത്. പെയിന്റിംഗ് തൊഴിലാളിയാണ്. നാഗമ്പടം പാലംകടന്ന് നഗരത്തിലേക്ക് പ്രവേശിക്കുമ്പോള് പുതുതായി നിര്മ്മിക്കുന്ന മേല്പ്പാലത്തിന് സമീപം ഇദ്ദേഹം സഞ്ചരിച്ചിരുന്ന ആക്ടീവ സ്കൂട്ടര് ഡിവൈഡറില് തട്ടി മറിഞ്ഞു. നിയന്ത്രണം വിട്ട സ്കൂട്ടര് ടിപ്പറനടയിലേക്കാണ് വീണത്.
മുന്നോട്ട് നീങ്ങിയ ടിപ്പറിന്റെ പിന്ചക്രങ്ങള് ജോബി ജോസഫിന്റെ തലയിലൂടെ കയറിയിറങ്ങി. സംഭവസ്ഥലത്തുവച്ച് തന്നെ ജോബി മരിച്ചു. സ്ഥലത്തുണ്ടായിരുന്ന പോലീസും നാട്ടുകാരും ചേര്ന്ന് മൃതദേഹം മെഡിക്കല് കോളേജില് എത്തിച്ചു. സീനയാണ് മരിച്ച ജോബിയുടെ ഭാര്യ. മകന് ജിയോണ്(4).
മേല്പ്പാലനിര്മ്മാണം നടക്കുന്നതിനാല് ഈ മേഖലയില് അപകടങ്ങള് പതിവാണ്. ജൂണ് 5ന് ഇതേസ്ഥലത്തുവച്ചുതന്നെ നട്ടാശേരി കണ്ണന്തൊട്ടിയില് ശ്രീകുമാര് (51) ബസ് കയറി മരിച്ചിരുന്നു. ഇദ്ദേഹം സഞ്ചരിച്ചിരുന്ന ബൈക്കില് ബസിടിക്കുകയും നിലത്തുവീണ ശ്രീകുമാറിന്റെ തലയിലൂടെ ബസിന്റെ ചക്രങ്ങള് കയറിയിറങ്ങുകയുമായിരുന്നു. മെഡിക്കല് റെപ്രസെന്റേറ്റീവായിരുന്നു ശ്രീകുമാര്.
മേല്പ്പാലത്തിന്റെ ഇരുവശങ്ങളിലും വാഹനങ്ങളുടെ നീണ്ടനിര പതിവാണ്. കിലോമീറ്ററുകളോളം നീളുന്ന നിരയുടെ പിന്നില്നിന്നും മുന്നില് എത്താന് വാഹനങ്ങളുടെ ഇടയിലൂടെ ബൈക്ക് യാത്രികര് കയറിവരുമ്പോഴാണ് അപകടം ഉണ്ടാവുന്നത്. നിരങ്ങി നീങ്ങുന്നതിന് ഇടയില് വലിയ വാഹനങ്ങള് ഏതെങ്കിലും തട്ടി ബൈക്ക് യാത്രികര് മറിഞ്ഞ് വീഴുന്നത് ഇവിടെ പതിവ് കാഴ്ചയാണ്. ഇഴഞ്ഞുനീങ്ങുന്ന മേല്പ്പാല നിര്മ്മാണമാണ് ഇവിടെ കാലങ്ങളായി കുരുക്കിന് ഇടയാക്കുന്നത്. കരാര് കാലാവധി കഴിഞ്ഞിട്ടും നിര്മ്മാണം പൂര്ത്തിയാക്കാന് കരാറുകാരനും നടപടികള്ക്ക് അധികൃതരും തയ്യാറാകുന്നില്ല. ഇവരുടെ അലംഭാവം മൂലം നിരവധി ജീവനുകളാണ് ഇവിടെ പൊലിയുന്നത്.
