അടിമാലി : റിസോര്ട്ട് ജിവനക്കാരിയായ വീട്ടമ്മക്കുനേരെ രാത്രിയില് പീഡനശ്രമം. വീട്ടിന്റെ വാതില് പൊളിച്ച് അകത്തുകയറിയ അക്രമി വധഭീഷണി മുഴക്കിയാണ് അക്രമത്തിന് ശ്രമിച്ചത്. സംഭവത്തില് വെള്ളത്തൂവല് പോലീസ് കേസെടുത്തു. പള്ളിവാസല് ലക്ഷ്മി ഹരിജന് കോളനിയിലെ താമസക്കാരിയായ നാല്പ്പത്തിരണ്ട്കാരിക്ക് നേരെയാണ് പീഡനശ്രമം നടന്നത്.
തിങ്കളാഴ്ച്ച രാത്രിയില് വീട്ടില് ആളില്ലാതിരുന്ന സമയത്ത് വാതില് പൊളിച്ച് അകത്ത് കയറിയ അക്രമി വധഭീഷണി മുഴക്കി പീഡിപ്പിക്കാന് ശ്രമിക്കുകയായിരുന്നുവെന്ന് അക്രമത്തിന് ഇരയായ വീട്ടമ്മ പറഞ്ഞു. ജോലി സംബന്ധമായ ആവശ്യങ്ങള്ക്കായി ഭര്ത്താവും മക്കളും തിരുവനന്തപുരത്ത് താമസിക്കുന്നതിനാല് മൂന്നാറിലെ റിസോര്ട്ട് ജീവനക്കാരിയായ വീട്ടമ്മ ലക്ഷ്മി ഹരിജന് കോളനിയിലെ വീട്ടില് ഒറ്റക്കായിരുന്നു താമസിച്ച് വന്നിരുന്നത്. രാത്രി പത്ത് മണിയോടെ വീടിന്റെ കതകില് മുട്ടിവിളിച്ച അക്രമി വീട്ടമ്മയുടെ മകന്റെ ഫോണ് നമ്പര് നല്കാന് ആവശ്യപ്പെട്ടു. ഇതിന് വിസമ്മതിച്ചതോടെ അക്രമി വാതില് തകര്ത്ത് അകത്ത് കയറി വീട്ടമ്മയെ മാനഭംഗപ്പെടുത്താന് ശ്രമിക്കുകയും ചെയ്തു. അക്രമിയുടെ കൈയ്യില് നിന്നും കുതറി രക്ഷപ്പെട്ട വീട്ടമ്മ തൊട്ടടുത്ത വീട്ടില് അഭയം പ്രാപിച്ചു.
അയല്വാസികള് ചേര്ന്ന് ഏറെപണിപ്പെട്ടാണ് വീട്ടമ്മയെ പിന്തുടര്ന്നെത്തിയ അക്രമിയെ തുരത്തിയോടിച്ചത്. സമീപത്തെ താമസക്കാരനായ വീരപാണ്ഡിയെന്നയാളാണ് അക്രമത്തിന് ശ്രമിച്ചതെന്ന് അയല്വാസിയായ യുവതി പറഞ്ഞു. സംഭവത്തില് വെള്ളത്തൂവല് പോലീസ് കേസെടുത്ത് പ്രതിക്കായി തിരച്ചില് ആരംഭിച്ചു. അക്രമത്തിനിരയായ വീട്ടമ്മ അടിമാലി താലൂക്കാശുപത്രിയില് ചികത്സ തേടി.
