എരുമേലി: പുറംമ്പോക്ക് ഭൂമി കയ്യേറി വീട് നിര്മ്മിച്ചുവെന്ന പഞ്ചായത്ത് കമ്മറ്റിയുടെ കണ്ടെത്തലിന്റെ അടിസ്ഥാനത്തില് കെട്ടിടത്തിന് നമ്പര് നിഷേധിച്ച സംഭവത്തിനെതിരെ നല്കിയ പരാതിയില് സ്വകാര്യ വ്യക്തിയുടെ കെട്ടിടത്തിന് താത്ക്കാലിക നമ്പര് മാറ്റി സ്ഥിര നമ്പര് പതിച്ചു കൊടുക്കാന് ഹൈക്കോടതി ഉത്തരവ്. എരുമേലി കൊരട്ടി സ്വദേശി വെട്ടിക്കൊമ്പില് രാജേന്ദ്രനാണ് ഗ്രാമപഞ്ചായത്ത് കമ്മറ്റിയുടെ തീരുമാനത്തിനെതിരെ ഹൈക്കോടതിയെ സമീപിച്ചത്.
2012ലാണ് സംഭവം. കൊരട്ടി കണ്ണിമല റോഡരികില് വീട് നിര്മ്മിക്കുന്നതിനായി പെര്മിറ്റിനായി അപേക്ഷ നല്കിയെങ്കിലും പുറംമ്പോക്ക് ഭൂമിയുണ്ടെന്ന് പറഞ്ഞ് അപേക്ഷ നിരസിക്കുകയായിരുന്നു. എന്നാല് ഭൂമി അളന്ന് തിട്ടപ്പെടുത്താന് രാജേന്ദ്രന് നിരവധി തവണ ആവശ്യപ്പെട്ടെങ്കിലും സാങ്കേതിക കാരണങ്ങള് നിരത്തി പഞ്ചായത്ത് കമ്മറ്റിയും ഉദ്യോഗസ്ഥരും ഭൂമി അളക്കുന്നത് തടസപ്പെടുത്തുകയായിരുന്നുവെന്നും അദ്ദേഹം പത്രസമ്മേളനത്തില് പറഞ്ഞു. രാജേന്ദ്രന്റെ പരാതിയുടെ അടിസ്ഥാനത്തില് 23 ല് 22 പഞ്ചായത്തംഗങ്ങളേയും വിളിച്ചു വരുത്തിയ ഓംബുഡ്സ്മാന് കേസില് നടപടി സ്വീകരിക്കാന് നിര്ദ്ദേശിച്ചതും പഞ്ചായത്തിന് തിരിച്ചടിയായിരുന്നു.
പരാതികളുടെ അടിസ്ഥാനത്തില് സര്വ്വെ അസിസ്റ്റന്റ് ഡയറക്ടറുടെ നേതൃത്വത്തില് ഭൂമി അളന്ന് പുറംമ്പോക്കില്ലെന്ന് റിപ്പോര്ട്ട് നല്കുകയും ചെയ്തിരുന്നു. ഇതിന്റെ അടിസ്ഥാനത്തില് വീട് നിര്മ്മിച്ചെങ്കിലും പഞ്ചായത്ത് വീട്ടുനമ്പര് നല്കാതെ കോടതിയെ സമീപിക്കുകയായിരുന്നു. എന്നാല് കോടതിയില് പഞ്ചായത്തിന്റെ വാദങ്ങളെല്ലാം വസ്തുതാപരമല്ലെന്ന് കണ്ടെത്തിയതിന്റെ അടിസ്ഥാനത്തില് കെട്ടിടത്തിന് താത്ക്കാലിക നമ്പര് നല്കാന് പഞ്ചായത്തിനോട് നിര്ദ്ദേശിക്കുകയായിരുന്നു. വീട് നിര്മാണം പൂര്ത്തിയായതിനു ശേഷം സ്ഥിരംനമ്പര് നല്കാത്തതിനെതിരെ രാജേന്ദ്രന് വീണ്ടും കോടതിയെ സമീപിക്കുകയായിരുന്നു. പഞ്ചായത്തിന്റെ കരാര് ജോലി എടുക്കുന്ന രാജേന്ദ്രന് ഒരു കരാറിന് കൈക്കൂലി നല്കാത്തതാണ് നിയമ പോരാട്ടത്തിന് വഴിയൊരുക്കിയത്. കേസിനായി പഞ്ചായത്ത് ലക്ഷങ്ങളാണ് ചെലവഴിച്ചത്. എന്നാല് കേസിനു പിന്നില് വ്യക്തി വൈരാഗ്യമാണെന്ന് കോടതി കണ്ടെത്തിയെന്നും സ്ഥിരവീട്ടുനമ്പര് നല്കാന് ഉത്തരവിടുകയായിരുന്നുവെന്നും അദ്ദേഹം പറഞ്ഞു. പഞ്ചായത്തിന്റെ അഴിമതി ഭരണത്തിനെതിരെ നഷ്ടപരിഹാരത്തിനായി കേസ് കൊടുക്കുമെന്നും രാജേന്ദ്രന് പറഞ്ഞു.
