കുടമാളൂര്: ഉതൃട്ടാതി നാളില് കുമാരനല്ലൂര് ദേവീക്ഷേത്രത്തില് നിന്നും പുറപ്പെടുന്ന ഊരുചുറ്റുവള്ളംകളിക്ക് കുടമാളൂര് സംഘമിത്ര അക്ഷയശ്രീ വരവേല്പ്പ് നല്കും.
ഉതൃട്ടാതി നാളില് കുമാരനല്ലൂര് ദേവിയുടെ സിംഹവാഹനം കളിവള്ളത്തില് പ്രതിഷ്ഠിച്ച് മീനച്ചിലാറ്റിലൂടെ സഞ്ചരിച്ച് തിരികെ ക്ഷേത്രക്കടവില് എത്തിച്ചേരുന്നതാണ് ഊരുചുറ്റുവള്ളംകളി. ഇതോടൊപ്പം നിരവധി കളിവള്ളങ്ങളും അകമ്പടി സേവിക്കും. ദേശവഴികളായ ഇടത്തില് മണപ്പുറം, പനയക്കഴിപ്പ്, ചുങ്കം, ഗോവിന്ദപുരം, കല്ലുമട, പുലിക്കുട്ടിശേരി, കുടമാളൂര്, ഗാന്ധിനഗര് വഴിയാണ് തിരികെയെത്തുന്നത്. ഭക്തജനങ്ങള് കരവഞ്ചിയോടെ വഞ്ചിപ്പാട്ടും പാടി ദേവിയുടെ സിംഹവാഹനം തിരികെ ക്ഷേത്രത്തില് എത്തിക്കും.
നൂറ്റാണ്ടുകളായി നടന്നുവരുന്ന ഈ ചടങ്ങില് ഭക്തജനങ്ങള് നിറപറവച്ച് ദേവീവാഹനത്തെ സ്വീകരിക്കും. കുമാരനല്ലൂരമ്മ ഓണനാളില് ദേശവഴികളിലൂടെ സഞ്ചരിച്ച് ഭക്തരെ അനുഗ്രഹിക്കുന്നുവെന്നാണ് ഐതീഹ്യം. ഇതോടനുബന്ധിച്ച് സംഘമിത്ര അക്ഷയശ്രീ കുടമാളൂര് പിച്ചനാട്ട് കടവില് വിപുലമായ ഒരുക്കങ്ങളാണ് നടത്തുന്നത്. കേരളീയ വേഷം ധരിച്ചെത്തുന്ന സ്ത്രീകള് നിലവിളക്കുകള് കൊളുത്തിയും നിറപറവച്ചും ദേവീവിഗ്രഹത്തെ സ്വീകരിക്കും. വഞ്ചിപ്പാട്ടും ഭജനയും നടക്കും. പ്രസിഡന്റ് കുടമാളൂര് രാധാകൃഷ്ണന്, സെക്രട്ടറി ഗിരീഷ്.പി.സി, സതീഷ് കുമാര്, കെ.വി.സാബു തുടങ്ങിയവര് നേതൃത്വം നല്കും.
