ന്യൂദല്ഹി: കോണ്ഗ്രസ് നേതാവും എം.പിയുമായ ശശി തരൂരിന്റെ ഭാര്യ സുനന്ദ പുഷ്കര് മരിച്ചു കിടന്ന മുറിയില് വീണ്ടും പരിശോധന. ദല്ഹിയിലെ ലീലാ പാലസ് ഹോട്ടലിലെ മുറിയിലാണ് പരിശോധന. ഫോറന്സിക് സംഘമാണ് പരിശോധന നടത്തുന്നത്. എസ്ഐടിയിലെ മുതിര്ന്ന ഉദ്യോഗസ്ഥരും ഹോട്ടലില് എത്തിയിട്ടുണ്ട്.
2014 ജനവരി 17നാണ് സുനന്ദയെ ദല്ഹിയിലെ പഞ്ചനക്ഷത്ര ഹോട്ടലായ ലീലാ പാലസിലെ മുറിയില് മരിച്ച നിലയില് കണ്ടെത്തിയത്. മരണം കൊലപാതകമാണെന്നും ശശി തരൂരിന് പങ്കുണ്ടെന്നുമാണ് ആരോപണം. സുനന്ദയുടെ ദുരൂഹ മരണത്തില് രണ്ടാഴ്ചക്കകം റിപ്പോര്ട്ട് സമര്പ്പിക്കാന് ദല്ഹി പോലീസിന് കഴിഞ്ഞ ദിവസം ഹൈക്കോടതി നിര്ദ്ദേശം നല്കിയിരുന്നു.
കേസിലെ അന്വേഷണ പുരോഗതി വിലയിരുത്തണമെന്ന അഡീഷണല് സോളിസിറ്റര് ജനറല് സഞ്ജയ് ജയിന്റെ ആവശ്യത്തെ തുടര്ന്നാണ് ഹൈക്കോടതിയുടെ ഇടപെടല്. അന്വേഷണത്തില് വീഴ്ചയുണ്ടായോ എന്ന് പരിശോധിക്കാന് ഉന്നത പോലീസ് ഉദ്യോഗസ്ഥരെ ചേംബറില് വിളിച്ചുവരുത്തി സംസാരിക്കണമെന്നും സഞ്ജയ് ജയിന് ആവശ്യപ്പെട്ടു.
മൂന്ന് വര്ഷത്തിലേറെയായി അന്വേഷണം നടക്കുകയാണ്. അവസാനിക്കാത്ത അന്വേഷണമായി ഈ കേസ് മാറരുതെന്നും കേസിന്റെ പുരോഗതി അറിയിക്കണമെന്നും കോടതി ആവശ്യപ്പെട്ടിരുന്നു.
