ന്യൂദല്ഹി: ഒബിസി ക്രീമിലെയര് നിശ്ചയിക്കുന്നതിന് കേന്ദ്ര പൊതുമേഖലാ സ്ഥാപനങ്ങള്, ബാങ്കുകള്, ഇന്ഷൂറന്സ് കമ്പനികള് എന്നിവയിലെ തസ്തികകള് സര്ക്കാര് തസ്തികകളുമായി ഏകീകരിക്കാന് കേന്ദ്രമന്ത്രിസഭാ യോഗം അനുമതി നല്കി. ഇത്തരം സ്ഥാപനങ്ങളിലുള്ള പിന്നാക്ക വിഭാഗത്തില്പ്പെട്ട ജീവനക്കാരുടെ മക്കള്ക്ക് ഇനിമുതല് ഒബിസി സംവരണാനുകൂല്യം ലഭിക്കും.
24 വര്ഷത്തെ പിന്നാക്ക വിഭാഗങ്ങളുടെ കാത്തിരിപ്പാണ് കേന്ദ്രസര്ക്കാര് അവസാനിപ്പിച്ചത്. പൊതുമേഖലാ സ്ഥാപനങ്ങളിലും ബാങ്കുകളിലും മറ്റും ഉയര്ന്ന പദവികളിലുള്ളവരെ നോണ് ക്രീമിലെയര് വിഭാഗമായി പരിഗണിക്കുന്നതിനും അവസാനമാകും. തസ്തിക ഏകീകരണം നടക്കാത്തതിനാല് ഈ വിഭാഗത്തിലുള്ള കുട്ടികളെ വരുമാനത്തിന്റെ തെറ്റായ വ്യാഖ്യാനത്തിലൂടെ നോണ് ക്രീമിലെയര് വിഭാഗത്തിലാണ് പരിഗണിച്ചിരുന്നത്. ഇത് അര്ഹതപ്പെട്ടവര്ക്ക് ആനുകൂല്യം നിഷേധിക്കാന് ഇടയാക്കിയെന്ന് കേന്ദ്രമന്ത്രിസഭാ യോഗം വിലയിരുത്തി.
പൊതുമേഖലാ സ്ഥാപനങ്ങളിലെ എല്ലാ എക്സിക്യൂട്ടീവ് തസ്തികകളും (ബോര്ഡുതല എക്സിക്യൂട്ടീവും മാനേജീരിയല്തല തസ്തികകളും) കേന്ദ്രത്തിലെ ഗ്രൂപ്പ് എ തസ്തികകളായി കണക്കാക്കും. അതോടെ അത് ക്രീമിലെയര് ആകും. പൊതുമേഖലാ ബാങ്കുകള്, ധനകാര്യ സ്ഥാപനങ്ങള്, പൊതുമേഖലാ ഇന്ഷൂറന്സ് കമ്പനികള് തുടങ്ങിയ സ്ഥാപനങ്ങളില് ജൂനിയര് മാനേജ്മെന്റ് ഗ്രേഡ് സ്കെയ്ല് 1നും അതിനുമുകളിലുമുള്ള തസ്തികകളും കേന്ദ്ര സര്വീസിലെ എ ഗ്രേഡ് തസ്തികയ്ക്ക് തുല്യമാക്കി. പൊതുമേഖലാ ബാങ്കുകളിലെയും ഇന്ഷൂറന്സ് കമ്പനികളിലെയും ക്ലര്ക്ക്, പ്യൂണ് എന്നീ തസ്തികകളിലുള്ളവര്ക്ക് കാലാകാലങ്ങളിലുണ്ടാകുന്ന വരുമാനമാറ്റം പരിശോധിച്ച് തീരുമാനമെടുക്കും. ഓരോ ബാങ്കും പൊതുമേഖലാ സ്ഥാപനങ്ങളും ഇന്ഷൂറന്സ് കമ്പനികളും തങ്ങളുടെ വ്യക്തിഗതമായ തസ്തികകളെക്കുറിച്ച് ബന്ധപ്പെട്ട ബോര്ഡിന് മുന്നില് അവതരിപ്പിച്ച് തുടര് നടപടി സ്വീകരിക്കണം.
പിന്നാക്ക വിഭാഗങ്ങളുടെ സംവരണത്തിന് ക്രീമിലെയര് നിര്ണയിക്കുന്നതിനുള്ള വാര്ഷിക കുടുംബവരുമാന പരിധി ആറ് ലക്ഷത്തില് നിന്ന് എട്ട് ലക്ഷം രൂപയായി ഉയര്ത്താന് കേന്ദ്ര സര്ക്കാര് നേരത്തെ തീരുമാനിച്ചിരുന്നു. പ്രതിമാസം 66,666 രൂപയ്ക്ക് താഴെ വരുമാനമുള്ളവര്ക്ക് ഇതനുസരിച്ച് സംവരണാനുകൂല്യം ലഭിക്കും.
മണ്ഡല് കമ്മിഷന് റിപ്പോര്ട്ടിലുള്ള സുപ്രീംകോടതി വിധിക്ക് ശേഷം 1993ല് ഒരു ലക്ഷം രൂപ വരുമാന പരിധി നിശ്ചയിച്ചാണ് ക്രീമിലെയര് നിലവില് വന്നത്. മറ്റ് പിന്നാക്ക വിഭാഗക്കാരെ ഉപവിഭാഗങ്ങളായി തരംതിരിക്കുന്നത് പരിശോധിക്കാന് കമ്മിഷനെ നിയമിക്കാനും മന്ത്രിസഭാ യോഗം തീരുമാനിച്ചിരുന്നു. ഉപവിഭാഗങ്ങളെ കണ്ടെത്തുന്നതിലൂടെ ഒബിസി ക്വോട്ടയില് മറ്റൊരു ക്വോട്ട വരും. ഒബിസി എന്ന വിശാല വിഭാഗത്തില് ഉള്പ്പെട്ടിട്ടുള്ള ജാതികളില് സംവരണത്തിന്റെ ഗുണഫലങ്ങള് ലഭ്യമാക്കുന്നതിലെ അസന്തുലിതാവസ്ഥ കമ്മിഷന് പരിശോധിക്കും.
