കേരളാ ഹിന്ദൂസ് ഓഫ് നോര്ത്ത് അമേരിക്ക സ്കോളര്ഷിപ്പ് വിതരണം സ്വാമി മോക്ഷവ്രതാനന്ദ ഉദ്ഘാടനം ചെയ്യുന്നു. പി. ശ്രീകുമാര്, കൃഷ്ണരാജ് മോഹന്, ഡോ. രേഖാമേനോന്, ഡോ. വി. സുരേഷ്കുമാര്, രാജു പിള്ള സമീപം
തിരുവനന്തപുരം: പഠനം പൂര്ണ്ണ മനസ്സോടെ വേണമെന്ന് ശാസ്തമംഗലം ശ്രീ രാമകൃഷ്ണാശ്രമം അധ്യക്ഷ്യന് സ്വാമി മോക്ഷവ്രതാനന്ദ. ഏകാഗ്രതയോടും നിശ്ചയദാര്ഢ്യത്തോടെയും പഠനത്തെ സമീപിക്കണം. കേരളാ ഹിന്ദൂസ് ഓഫ് നോര്ത്ത് അമേരിക്ക(കെഎച്ച്എന്എ)യുടെ പ്രൊഫഷണല് കോളേജ് വിദ്യാര്ത്ഥികള്ക്കുള്ള സ്കോളര്ഷിപ്പ് വിതരണം ഉദ്ഘാടനം ചെയ്യുകയായിരുന്നു സ്വാമി.
വിദ്യാഭ്യാസ പൂര്ത്തീകരണം അപരാവിദ്യയില് സമ്പൂര്ണ ജ്ഞാനം നേടിക്കൊണ്ടായിരിക്കണം. വിദ്യയില് തന്നെ രണ്ടുതരം ഉണ്ട്. പരാവിദ്യയും അപരാവിദ്യയും. ആത്മാവിനെ കുറിച്ചുള്ള അറിവാണ് പരാവിദ്യ. മറ്റെല്ലാ വിദ്യയും അപരാവിദ്യയില് പെടും. വിദ്യാര്ത്ഥികള് എല്ലാ വിഷയത്തിലും ഗ്രാഹ്യമുള്ളവരായിരിക്കണം. ലോകത്തിന്റെ ഭാവി യുവതലമുറയുടെ കൈയിലാണ്. സനാതന ധര്മ്മം നമ്മെ പഠിപ്പിക്കുന്നത് ഓരോ വ്യക്തിയിലും അനന്തസാധ്യത കുടികൊള്ളുന്നു എന്നാണ്. അത് സാക്ഷാത്കാരത്തിലെത്തിക്കുക എന്നതാണ് വിദ്യാര്ത്ഥികളുടെ കടമ. സ്വാമി പറഞ്ഞു.
കെഎച്ച്എന്എ പ്രസിഡന്റ് ഡോ. രേഖാമേനോന് അദ്ധ്യക്ഷത വഹിച്ചു. ജനറല് സെക്രട്ടറി കൃഷ്ണരാജ് മോഹന്, ട്രസ്റ്റി ബോര്ഡ് അംഗം രാജു പിള്ള, കോ-ഓര്ഡിനേറ്റ് പി. ശ്രീകുമാര്, ഡോ. വി. സുരേഷ്കുമാര്, രാജു പിള്ള എന്നിവര് സംസാരിച്ചു.
