ഇടുക്കി മെഡിക്കല്‍ കോളജ്!

അസാധാരണമായ നിരുത്തരവാദത്വത്തിന്റെ ഉദാഹരണമാണ് ഇടുക്കി മെഡിക്കല്‍ കോളജ്.

ഇടുക്കി ചെറുതോണി അണക്കെട്ടിനോടുചേര്‍ന്ന് ഹിന്ദുസ്ഥാന്‍ കണ്‍സ്ട്രക്ഷന്‍ കമ്പനിയുടെ ഹെഡാഫീസായിരുന്ന സ്ഥലം തിരഞ്ഞെടുത്തു. അതില്‍ പകുതി വിദ്യാധിരാജ വിദ്യാഭവന്‍ സ്‌കൂളിന് കമ്പനി വളരെ നേരത്തെ പ്രവര്‍ത്തിക്കാനവസരമൊരുക്കി.

ഒരു ജീപ്പിനു കഷ്ടിച്ച് യാത്രയാകാവുന്ന റോഡുണ്ട്. ഓരോ തട്ടിലും കെട്ടിടങ്ങള്‍ ഉയരുമ്പോള്‍ അതിലോരോന്നിന്റെയും മുന്നില്‍ വളരെ വേഗമെത്താന്‍ വേറെ റോഡുവേണം. അതില്ല. കോളജിനും ലാബറട്ടറിക്കും ഓപ്പറേഷന്‍ തീയറ്ററിനും ചില്‍ഡ്രന്‍സ് വാര്‍ഡിനും പ്രസവവാര്‍ഡിനും തുടങ്ങി 28 വകുപ്പുകള്‍ക്കും ധാരാളം സ്ഥലം വേണം. ഇപ്പോഴില്ല. ഡോക്ടര്‍മാര്‍/നഴ്‌സ്/ ഇതര ജീവനക്കാര്‍ക്കായി 500 ക്വാര്‍ട്ടേഴ്‌സുകള്‍ വേണം. അതും ഇപ്പോഴില്ല. ഉടനെ ഉണ്ടാവുകയുമില്ല.

ഇവിടെ ജീവന്റെ വിവിധ ഘട്ടങ്ങളിലെ അവശിഷ്ടങ്ങളും ഇതരമാലിന്യങ്ങളും. ഒരുദിവസം എന്തെങ്കിലും കാരണവശാല്‍ മുടക്കം വന്നാല്‍ കുമിഞ്ഞുകൂടുന്ന മാലിന്യങ്ങള്‍ ചീഞ്ഞുനാറി ആശുപത്രിയിലേക്കു വരുന്നവരെയും രോഗികളാക്കും.

അവയെല്ലാം ബയോഗ്യാസ് പ്ലാന്റ്, ഇന്‍സിനറേറ്റര്‍, വളം എന്നീ മാര്‍ഗ്ഗങ്ങളിലൂടെ പരിഹരിക്കപ്പെടണമെങ്കില്‍ തരംതിരിക്കാനും പൊടിച്ചടുക്കാനും സ്ഥലം വേണം. ഇതൊന്നുമായിട്ടില്ല. സ്ഥലംകണ്ടെത്തണം. നിലവില്‍ കക്കൂസ് ടാങ്ക് പൊട്ടിയാല്‍/നിറഞ്ഞാല്‍ അത് താഴെ ചെറുതോണി ടൗണിലേക്ക് മാത്രമേ എത്തൂ. സാധാരണ കേരളത്തിലെ മെഡിക്കല്‍ കോളജിലെ വാഹനപാര്‍ക്കിങ് ശ്രദ്ധിച്ചാല്‍ ഇവിടെ ഒട്ടും കുറയാന്‍ സാധ്യതയില്ല. കുറഞ്ഞത് 500 വണ്ടിക്ക് പാര്‍ക്കാനിടം വേണം. അതില്ല.

അത്യാസന്ന നിലയിലുള്ളവരെ എത്തിക്കുന്നതിനുള്ള വഴി എത്ര വീതിയില്‍ വേണമെന്ന് ഇപ്പോള്‍ നാട്ടുകാര്‍ക്കെല്ലാം അറിയാം. ഇവിടെ അങ്ങനെയൊന്നുമില്ല.

ഇത്തരമൊരു സ്ഥാപനത്തില്‍ എത്ര വെള്ളമെടുത്താലും വേസ്റ്റ് വാട്ടര്‍ റി-സൈക്ലിങ് ഇല്ല, ശുദ്ധീകരണ പ്രക്രിയകള്‍ ഇല്ല, എല്ലാം ചെറുതോണി ടൗണിലെത്തും.

ചുരുക്കത്തില്‍ മാസ്റ്റര്‍ പ്ലാനില്ലാതെ, 25 ഓളം വകുപ്പുകള്‍ പഠിച്ച് റിപ്പോര്‍ട്ട് വക്കാതെ മെഡിക്കല്‍ കോളജ് പ്രഖ്യാപിച്ച് ഒരു ഭരണക്കാര്‍ ഇറങ്ങിപ്പോയി. അടുത്ത ഭരണക്കാര്‍ക്ക് അമ്മതൊട്ടിലില്‍ കിട്ടിയ കുട്ടിയെപ്പോലെ ഈ പാപഭാരം!

ടൗണ്‍ പ്ലാനിങ്ങിനെ പ്രയോജനപ്പെടുത്തി ചണ്ഡിഗഢ് മോഡല്‍ ടൗണ്‍ഷിപ്പായിരുന്നു പ്ലാന്‍. പക്ഷെ നമ്മുടെ രാഷ്‌ട്രീയക്കാര്‍ ആദ്യം കയ്യേറി. പിന്നാലെ സകല മാടക്കടകളുമായി. വരാനിരിക്കുന്ന ദുരന്തം കടുപ്പമേറിയതാണ്. എല്ലാം ശരിയാകുമെന്നാണ് പ്രതീക്ഷ പക്ഷെ ഒന്നും ശരിയാവുകയില്ല.

കരിങ്കുന്നം രാമചന്ദ്രന്‍ നായര്‍,

തൊടുപുഴ