സാര്‍വ്വജനീക ഗണേശോത്സവത്തിന് തുടക്കമായി

കണ്ണൂര്‍: ഗണേശ സേവാകേന്ദ്രത്തിന്റെ ആഭിമുഖ്യത്തില്‍ ജില്ലയിലെ വിവിധ കേന്ദ്രങ്ങളില്‍ സാര്‍വ്വജനീക ഗണേശോത്സവത്തിന് തുടക്കമായി. നാളെ നിമജ്ജന ഘോഷയാത്രയോടെ ഗണേശോത്സവം സമാപിക്കും. വിവിധ ക്ഷേത്രങ്ങളുടെയും മഠങ്ങളുടെയും ഗ്രാമ കൂട്ടായ്‌മകളുടെയും സംയുക്താഭിമുഖ്യത്തിലാണ് പരിപാടികള്‍ നടക്കുന്നത്. ഇന്നലെ രാവിലെ 4 മണിക്ക് കണ്ണൂര്‍ പിള്ളയാര്‍ കോവിലില്‍ ഗണപതിവിഗ്രഹം അലങ്കരിച്ചിരുത്തി. തുടര്‍ന്ന് അഷ്ടദ്രവ്യഗണപതിഹോമം, മറ്റ് പൂജകള്‍ എന്നിവ നടന്നു. ഇന്ന് രാവിലെ 4 മണിക്ക് ഗണപതിഹോമം, 8 മണിക്ക് ഗണപതി സഹസ്രനാമം, 11 മണിക്ക് മഹാദീപാരാധന, 12 മണിക്ക് അന്നദാനം, വൈകുന്നേരം 6.30 ന് കണ്ണൂര്‍ ആഞ്ജനേയ ഭജനസമിതിയുടെ ഭജന, രാത്രി 8 മണിക്ക് അത്താഴപൂജ, നാളെ രാവിലെ 4 മണിക്ക് ഗണപതിഹോമം, 6.30 ന് മഹാപൂര്‍ണാഹുതി, മഹാദീപാരാധന, 12 മണിക്ക് ഉച്ചപൂജ, വൈകുന്നേരം 3 മണിക്ക് ഗണപതി ദീപാരാധന, 3.30 ന് ചെണ്ടമേളശിഖാമണി പരേതനായ പി.സി.ഗംഗാധരന്‍ ഗുരുക്കളുടെ ശിഷ്യന്‍ നയിക്കുന്ന ചെണ്ടമേളത്തോടു കൂടിയുള്ള ഗണേശവിഗ്രഹ സംഗമ ഘോഷയാത്ര എന്നിവ നടക്കും. ഘോഷയാത്ര താളിക്കാവ് മൈതാനിയില്‍ സ്വാമി അമൃതകൃപാനന്ദപുരി ഉദ്ഘാടനം ചെയ്യും. ഘോഷയാത്ര മുനീശ്വരന്‍ കോവില്‍, സ്റ്റേഷന്‍ റോഡ്, ഫോര്‍ട്ട് റോഡ്. ബാങ്ക് റോഡ്, മുത്തുമാരിയമ്മന്‍ കോവില്‍, കൃഷ്ണന്‍ കോവില്‍, കാമാക്ഷിയമ്മന്‍ കോവില്‍, പിള്ളയാര്‍ കോവില്‍ എന്നിവിടങ്ങളിലെ സ്വീകരണങ്ങള്‍ക്ക് ശേഷം നാരായണപാര്‍ക്ക് വഴി പയ്യാമ്പലം കടപ്പുറത്തെത്തും. കടപ്പുറത്ത് നടക്കുന്ന സമാപന സംഗമത്തില്‍ കെ.എന്‍.രാധാകൃഷ്ണന്‍ മാസ്റ്റര്‍ പ്രഭാഷണം നടത്തും. തുടര്‍ന്ന് ഗണപതി പൂജ, മഹാ ആരതി എന്നിവക്ക് ശേഷം ഗണേശവിഗ്രഹങ്ങള്‍ കടലില്‍ നിമജ്ജനം ചെയ്യും.

ചിന്മയ മിഷന്റെ ആഭിമുഖ്യത്തില്‍ വിനായക ചതുര്‍ത്ഥി വിവിധ പരിപാടികളോടെ ആഘോഷിച്ചു. ചാല ചിന്മയ എഡുക്കേഷന്‍ കാമ്പസ്സിലെ ഗണേശ മന്ദിറില്‍ ഗണപതിഹോമം, ഗണേശപൂജ, ഗണപതിക്ക് തേങ്ങയുടക്കല്‍ എന്നിവ നടന്നു. വൈകുന്നേരം ചിന്മയ ബാലഭവനില്‍ ഗുരുസ്‌തോത്രം, വേദമന്ത്രോച്ചാരണം, ഭജന, ആരതി, പ്രഭാഷണം എന്നിവയുമുണ്ടായി.

ആലക്കോട് ഗണേശസേവാ സമിതിയുടെ ആഭിമുഖ്യത്തിലുള്ള സാര്‍വ്വജനീക ഗണേശോത്സവത്തിന് തുടക്കമായി. ഇന്നലെ ആലക്കോട് ഹിന്ദുധര്‍മ്മസ്തൂപം മുത്തപ്പന്‍ ദേവസ്ഥാനത്ത് ഗണേശ വിഗ്രഹ പ്രതിഷ്ഠ നടത്തി. ഇന്ന് ഉച്ചക്ക് 12.30 ന് പ്രസാദ വിതരണം, വൈകുന്നേരം 3 മണിക്ക് ഗണേശവിഗ്രഹ നിമജ്ജന ഘോഷയാത്ര, 4 ന് പ്രഭാഷണം എന്നിവ നടക്കും.

കണ്ണൂര്‍ പിള്ളയാര്‍ കോവിലില്‍ പാലഭിഷേകം, ഗണപതിേഹോമം, ചന്ദനക്കാപ്പ് അലങ്കാരം, ദീപാരാധന എന്നിവ നടന്നു. താളിക്കാവ് ഗണേശസമിതിയുടെ നേതൃത്വത്തില്‍ ഗണപതി പ്രതിഷ്ഠ, ദീപാരാധന, ഗണപതിഹോമം എന്നിവയും അഡ്വ.എ.വി.കേശവന്റെ പ്രഭാഷണവും നടന്നു. ഇതൊടൊപ്പം ആയിരക്കണിനാള്‍ക്കാര്‍ക്ക് പ്രസാദസദ്യയും ഉണ്ടായിരുന്നു. ഇന്ന് വൈകുന്നേരം കാക്കവിളക്ക് അലങ്കാരം, നാളെ 2 മണിക്ക് പാല്‍പ്പായസദാനം എന്നിവയുണ്ടായിരിക്കും.