കണ്ണൂര്: നഗരത്തില് അലഞ്ഞുതിരിഞ്ഞു നടന്നിരുന്ന മാനസിക ദൗര്ബല്യമുള്ള വയോധികയെ ബന്ധുക്കള്ക്ക് സുരക്ഷിതമായി ഏല്പ്പിച്ച് പിങ്ക് പട്രോളിന്റെ സഹായഹസ്തം. കാസര്ഗോഡ് കുമ്പള സ്വദേശിനി സരസ്വതി(63)യെയാണ് കണ്ണൂരിലെ പിങ്ക് പട്രോള് പോലിസ് സംഘം രക്ഷപ്പെടുത്തി സുരക്ഷിതമായി ബന്ധുക്കള്ക്കു കൈമാറിയത്. കുമ്പളയില് മകളുടെ വീട്ടിലായിരുന്നു സരസ്വതിയുടെ താമസം. സഹോദരന് ശെല്വരാജിന്റെ വീട്ടിലേക്കെന്നു പറഞ്ഞ് പോയ ഇവരെ പിന്നീട് കാണാതാവുകയായിരുന്നു. രണ്ടുദിവസമായി മുനീശ്വരന് കോവില് പരിസരത്ത് ഒരു സ്ത്രീ അവശനിലയില് കഴിയുന്നുവെന്ന വിവരം സന്നദ്ധപ്രവര്ത്തകരാണ് ടൗണ് പോലിസിനെ അറിയിച്ചത്. ഇവര് വിവരം വനിതാസെല് മുഖേന പിങ്ക് പട്രോള് യൂനിറ്റിന് കൈമാറുകയായിരുന്നു. ഇതുപ്രകാരം പിങ്ക് പട്രോള് യൂനിറ്റിലെ വനിതാ എ.എസ്.ഐ കെ. കുമാരി, സിവില് ഓഫിസര്മാരായ സതി, സീന, സിന്ഷ എന്നിവര് 24നു വൈകീട്ട് സരസ്വതിയെ കസ്റ്റഡിയിലെടുത്തു. തുടര്ന്ന് മുതിര്ന്ന പൗരന്മാരുടെയും സംരക്ഷണാര്ഥം മേലെചൊവ്വയില് പ്രവര്ത്തിക്കുന്ന അമല ഭവനിലേക്ക് മാറ്റി. ഇവിടെവച്ച് ഭക്ഷണം, വസ്ത്രം, ശുശ്രൂഷ എന്നിവ ഉള്പ്പെടെയുള്ള പരിചരണങ്ങള് നല്കിയതും പിങ്ക് പട്രോള് സംഘം തന്നെ. ആദ്യം പരസ്പര വിരുദ്ധമായി സംസാരിച്ച സരസ്വതി ഒടുവില് സ്വദേശം ഉള്പ്പെടെയുള്ള വിവരങ്ങള് വെളിപ്പെടുത്തുകയായിരുന്നു. വനിതാസെല് മേധാവി കുമ്പള പോലിസ് സ്റ്റേഷനുമായി ബന്ധപ്പെട്ടാണു ബന്ധുക്കളെ കണ്ടെത്തിയത്. മകള് ശകുന്തളയും ഇവരുടെ മകന് വിഷ്ണുവും സരസ്വതിയെ കാണാന് ഇന്നലെ കണ്ണൂരിലെത്തി. നടപടിക്രമങ്ങള്ക്ക് ശേഷം സ്വരസ്വതിയെ ബന്ധുക്കള്ക്ക് കൈമാറി. വൈകുന്നേരത്തെ ട്രെയിനില് ഇവരെ നാട്ടിലേക്ക് യാത്രയാക്കാന് പിങ്ക് പട്രോള് സംഘവും കണ്ണൂര് റെയില്വേ സ്റ്റേഷനില് എത്തിയിരുന്നു. സ്ത്രീകള്ക്കും കുട്ടികള്ക്കുമെതിരായ അതിക്രമങ്ങളും കുറ്റകൃത്യങ്ങളും തടയുന്നതിനായി സംസ്ഥാന പോലിസ് നടപ്പാക്കിയ പുതിയ പദ്ധതിയാണു പിങ്ക് പോലിസ് പട്രോള്. കഴിഞ്ഞ ജനുവരിയിലാണ് കണ്ണൂരില് ഈ സംവിധാനം ആരംഭിച്ചത്.
മാനസിക ദൗര്ബല്യമുള്ള വയോധികയെ ബന്ധുക്കളെ ഏല്പ്പിച്ച് പിങ്ക് പട്രോളിന്റെ സഹായഹസ്തം.
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.