കോഴിക്കോട്: സാമൂഹ്യ സുരക്ഷാ മിഷനില് എക്സിക്യൂട്ടീവ് ഡയറക്ടര് നിയമനം മാനദണ്ഡങ്ങള് ലംഘിച്ച്. ഇതോടെ, വകുപ്പിന്റെ പ്രവര്ത്തനം അവതാളത്തിലായെന്ന് ആരോപണം. സാമൂഹ്യശാസ്ത്രഞ്ജനോ സംസ്ഥാനതല നിര്വഹണം നടത്തി ഭരണപരിചയമുള്ള അഡ്മിനിസ്ട്രേറ്ററോ ആയിരിക്കണം എക്സിക്യൂട്ടീവ് ഡയറക്ടര് എന്ന ചട്ടമാണ് മറികടന്നത്.
ഗവ. ആശുപത്രിയിലെ അസിസ്റ്റന്റ് സര്ജന് ഡോ. മുഹമ്മദ് അഷീലിനെ ആരോഗ്യ മന്ത്രി കെ.കെ. ശൈലജ ഇടപെട്ട് നിയമിക്കുകയായിരുന്നുവെന്ന് വിവരാവകാശ പ്രവര്ത്തകന് രവി ഉള്ള്യേരി പറഞ്ഞു. ഇദ്ദേഹത്തിന്റെ പരാതി ഫയലില് സ്വീകരിച്ച ലോകായുക്ത ഡിവിഷന് ബെഞ്ച്, ഐജി സുരേഷ് രാജ് പുരോഹിതിനോട് അന്വേഷിക്കാന് നിര്ദേശിച്ചു. പരാതിയില് 25ന് ലോകായുക്ത വാദം കേള്ക്കും.
സര്ക്കാര് സ്ഥാപനത്തില് ചീഫ് എക്സിക്യൂട്ടീവിനെ നിയമിക്കണമെങ്കില് മന്ത്രിസഭയോ മുഖ്യമന്ത്രിയോ അംഗീകരിച്ച് ഉത്തരവിറക്കണമെന്നാണ് ചട്ടം. ഇതിനു പുറമെ വിജിലന്സിന്റെ അനുമതിപത്രവും വേണം. എന്നാല്, ഇവിടെ ഇതൊന്നും പാലിച്ചില്ല. സിപിഎം യുവനേതാവിന്റെ ബന്ധുവായ അഷീലിന്റെ നിയമനം രഹസ്യമായിട്ടായിരുന്നു. ഡെപ്യൂട്ടേഷന് നിയമനം നടത്താനും ചട്ടങ്ങള് പാലിക്കണം. സെക്ഷന് ഓഫീസര് റാങ്കില്പ്പെടുന്ന അസിസ്റ്റന്റ് സര്ജനു കീഴില് രണ്ടു അണ്ടര് സെക്രട്ടറിമാരെയാണ് സാമൂഹ്യ സുരക്ഷാ മിഷനില് നിയമിച്ചത്.
നിയമനത്തിലെ അപാകത പല ജനോപകാരപ്രദമായ പദ്ധതികളുടെയും ഭാവി അവതാളത്തിലാക്കി. ഫണ്ട് ഉണ്ടായിട്ടും നടപ്പാക്കാനാകാത്ത സ്ഥിതിയാണിപ്പോള്. യുഡിഎഫ് സര്ക്കാര് കൊണ്ടു വന്ന ശ്രുതി തരംഗം പദ്ധതിക്ക് ഫണ്ട് അനുവദിച്ച് അഞ്ചു മാസം കഴിഞ്ഞിട്ടും കുട്ടികളെ കണ്ടെത്തി കോംക്ലിയര് ഇംപ്ലാന്റേഷന് നടത്താനായിട്ടില്ല.
താലോലം കാന്സര് സുരക്ഷാ പദ്ധതിക്കു സര്ക്കാര് ഫണ്ട് നല്കിയിട്ടും എം പാനല് ചെയ്ത ആശുപത്രികള്ക്ക് യാഥാസമയം നല്കാനാകാത്തത് ചികിത്സാ സഹായത്തിനു കാത്തിരിക്കുന്ന രോഗികളുടെ ജീവന് വരെ അപകടത്തിലാക്കും. എന്ഡോസള്ഫാന് ഇരകള്ക്കുള്ള സഹായ പദ്ധതി, സ്ത്രീ ശക്തീകരണം, വൈകല്യബാധിതര്ക്കുള്ള അനുയാത്ര, വിദ്യാഭ്യാസ ധനസഹായ പദ്ധതിയുള്പ്പെടെ കഴിഞ്ഞ ആറു മാസമായി അനിശ്ചിതത്വത്തിലായ അവസ്ഥയാണ്.
എക്സിക്യൂട്ടീവ് ഡയറക്റുടെ നിയമനം റദ്ദാക്കണമെന്നും ചട്ടലംഘനം നടത്തിയ മന്ത്രി കെ.കെ. ശൈലജക്കെതിരെ നടപടി സ്വീകരിക്കണമെന്നും രവി ഉള്ള്യേരി ആവശ്യപ്പെട്ടു.
