കണ്ണൂര്:പൊതുവിദ്യാലയങ്ങളെ ശക്തിപ്പെടുത്താന് പഠനനിലവാരം മെച്ചപ്പെടുത്തുകയല്ലാതെ മറ്റു വഴികളില്ലെന്ന് ജില്ലാ പഞ്ചായത്ത് ശില്പശാല. സമഗ്രവിദ്യാഭ്യാസ പദ്ധതിയുടെ ഭാഗമായി ജില്ലാ പഞ്ചായത്ത് നടപ്പാക്കുന്ന ‘വിദ്യാര്ത്ഥിക്കും വിദ്യാലയങ്ങള്ക്കും 100 ശതമാനം’ പദ്ധതിയുമായി ബന്ധപ്പെട്ട ശില്പശാലയാണ് പൊതുവിദ്യാലയങ്ങളിലെ അച്ചടക്കവും പഠന നിലവാരവും ഭൗതിക സാഹചര്യവും മെച്ചപ്പെടുത്തുന്നതിന്റെ ആവശ്യകത ഊന്നിപ്പറഞ്ഞത്.
ജില്ലാ പഞ്ചായത്ത് ഓഡിറ്റോറിയത്തില് നടന്ന ശില്പശാല ഫുട്ബോള് താരം സി.കെ.വിനീത്, അസി. കലക്ടര് ആസിഫ് കെ.യൂസുഫ്, ബാലതാരം ബേബി നിരഞ്ജന എന്നിവര് സംയുക്തമായി ദീപം തെളിയിച്ച് ഉദ്ഘാടനം ചെയ്തു. വിദ്യാര്ഥികള്ക്ക് പഠനത്തോടൊപ്പം കലാകായിക രംഗങ്ങളിലും മികവ് പുലര്ത്താന് അവസരം നല്കുന്നതാവണം വിദ്യാഭ്യാസമെന്ന സന്ദേശമാണ് ശില്പശാല മുന്നോട്ടുവയ്ക്കുന്നതെന്നും അതിന്റെ പ്രതീകമെന്ന നിലയിലാണ് വ്യത്യസ്ത മേഖലകളില് കഴിവ് തെളിയിച്ച മൂന്നു പേര് ഉദ്ഘാടനം നിര്വഹിച്ചതെന്നും ആമുഖപ്രഭാഷണത്തില് ജില്ലാ പഞ്ചായത്ത് പ്രസിഡന്റ് കെ.വി.സുമേഷ് പറഞ്ഞു.
വിദ്യാഭ്യാസമെന്നത് പരീക്ഷയില് മാത്രമല്ല, ജീവിതത്തിലും വിജയിക്കാനുതകുന്നതാവണമെന്ന് അസി.കലക്ടര് ആസിഫ് കെ യൂസഫ് അഭിപ്രായപ്പെട്ടു. അതിനുതകുന്ന തരത്തിലുള്ള വിദ്യാഭ്യാസമാണ് സ്കൂളുകളില് നിന്ന് ലഭിക്കേണ്ടത്. ജില്ലാ പഞ്ചായത്തിന്റെ സമഗ്രവിദ്യാഭ്യാസമെന്ന സങ്കല്പം സംസ്ഥാനത്തിന് മാതൃകയാണെന്നും അദ്ദേഹം പറഞ്ഞു.
വിദ്യാര്ഥിയായിരിക്കുമ്പോഴേ ഫുട്ബോളിലായിരുന്നു തന്റെ താല്പര്യമെന്നും പഠനത്തില് വല്ലാതെ ശ്രദ്ധിക്കാതെ കളി കാര്യമാക്കിയാണ് താന് വളര്ന്നതെന്നും ഫുട്ബോള് താരം സി.കെ.വിനീത് പറഞ്ഞു. ഓരോ വിദ്യാര്ഥിയുടെയും താല്പര്യത്തിനും പ്രതിഭയ്ക്കും അനുയോജ്യമായ വിദ്യാഭ്യാസവും പരിശീലനവുമാണ് വേണ്ടത്. ഓരോ കുട്ടിക്കും മികവ് തെളിയിക്കാനുള്ള അവസരങ്ങളുണ്ടാവണം. ആ അര്ഥത്തില് ജില്ലാ പഞ്ചായത്തിന്റെ സമഗ്ര വിദ്യാഭ്യാസമെന്ന കാഴ്ചപ്പാട് ശ്ലാഘനീയമാണെന്നും അദ്ദേഹം അഭിപ്രായപ്പെട്ടു.
അഭിനയത്തേക്കാള് സ്കൂളിലെത്തി പഠിക്കാനാണ് തിനിക്കിഷ്ടമെന്ന് ബേബി നിരഞ്ജന പറഞ്ഞു. നല്ലതു പഠിക്കാന് അവസരം ലഭിക്കുമ്പോഴാണ് നല്ലവരായി വളരാനാവുക. അതിനുള്ള സാഹചര്യവും സൗകര്യവും നമ്മുടെ വിദ്യാലയങ്ങളില് ഉണ്ടാവണമെന്നും നിരഞ്ജന പറഞ്ഞു.
ഉദ്ഘാടനച്ചടങ്ങില് ജില്ലാ പഞ്ചായത്ത് വൈസ് പ്രസിഡന്റ് പി.പി.ദിവ്യ, സ്റ്റാന്റിംഗ് കമ്മിറ്റി അധ്യക്ഷന്മാരായ കെ.പി.ജയബാലന് മാസ്റ്റര്, ടി.ടി റംല, ജില്ലാ പഞ്ചായത്ത് അംഗം അജിത്ത് മാട്ടൂല്, കെ.വി.ഗോവിന്ദന് തുടങ്ങിയവര് സംസാരിച്ചു.
മികച്ച വിദ്യാലയം എങ്ങനെയായിരിക്കണം എന്ന വിഷയത്തില് എസ്എസ്എ ജില്ലാ പ്രൊജക്ട് ഓഫീസര് ഡോ.പി.വി.പുരുഷോത്തമന് സംസാരിച്ചു. കഴിഞ്ഞ അക്കാദമിക വര്ഷത്തെ പരീക്ഷാ ഫലങ്ങളുടെ വിശകലനങ്ങള് ഡയറ്റ് സീനിയര് ലക്ചറര് ഡോ.എം.ബാലന്, ജില്ലാ കോ-ഓര്ഡിനേറ്റര് പി.ഒ മുരളീധരന്, വി.എച്ച്.എസ്.സി പ്രിന്സിപ്പല് സിജു എന്നിവര് അവതരിപ്പിച്ചു. ജില്ലാ പഞ്ചായത്ത് ഈ വര്ഷം നടപ്പാക്കുന്ന വിദ്യാഭ്യാസ പദ്ധതികളെക്കുറിച്ച് ഡയറ്റ് സീനിയര് ലക്ചറര് പി.യു രമേശന് വിശദീകരിച്ചു. വിവിധ ഏജന്സികള് നടപ്പാക്കുന്ന പദ്ധതികളെക്കുറിച്ച് ഡി.ഡി.ഇ യു കരുണാകരന്, കെ.ആര്.അശോകന്, എം.ജയരാജന്, ഡോ. സൂരജ് എന്നിവര് വിശദീകരിച്ചു. ഡയറ്റ് പ്രിന്സിപ്പല് കെ.പ്രഭാകരന് ചര്ച്ച ക്രോഡീകരിച്ചു. ജില്ലയില് കഴിഞ്ഞ വര്ഷത്തെ പൊതുപരീക്ഷകളില് 100 ശതമാനം വിജയം കൈവരിച്ച സ്കൂളുകളെ ചടങ്ങില് ആദരിച്ചു.
