ന്യൂദല്ഹി : മറാത്ത സമുദായത്തിന് ഒബിസിക്കുള്ള എല്ലാ സംവരണങ്ങളും നല്കുമെന്ന് മഹാരാഷ്ട്ര മുഖ്യമന്ത്രി ദേവേന്ദ്ര ഫട്നാവിസ്. മാറാത്ത സമുദായത്തിന് സംവരണം ഉള്പ്പടെയുള്ള ആനുകൂല്യങ്ങള് നല്കണമെന്ന് ആവശ്യപ്പെട്ട് ആറു ലക്ഷത്തിലേറെപ്പേര് പേര് മുംബൈയില് പ്രകടനം നടത്തിയതിനു പിന്നാലെയാണ് ഫട്നാവിസ് ഇക്കാര്യം അറിയിച്ചത്.
വിദ്യാഭ്യാസം, സര്ക്കാര് ജോലി എന്നിവയില് സംവരണവും, 14 കാരിയായ മറാത്തി പെണ്കുട്ടി കൂട്ട ബലാത്സംഗത്തിന് ഇരയായത് സംബന്ധിച്ച് അന്വേഷണവും ആവശ്യപ്പെട്ടായിരുന്നു സമരം. മറാത്ത വിദ്യാര്ത്ഥികള്ക്കായി ജില്ലാ അടിസ്ഥാനത്തില് ഹോസ്റ്റല് സംവിധാനങ്ങള് സ്ഥാപിക്കുന്നതിന് ഭൂമിയും അഞ്ച് കോടി രൂപ ഗ്രാന്ഡായും അനുവദിക്കുമെന്നും ഫട്നാവിസ് പറഞ്ഞു.
പെണ്കുട്ടി കൂട്ടബലാത്സംഗത്തിനിരയായ കേസില് വിചാരണ തുടരുകയാണ്. കഴിഞ്ഞ അഞ്ചുമാസത്തിനിടെ പബ്ലിക് പ്രോസിക്യൂട്ടര് ഉജ്ജ്വല് നികം 31 സാക്ഷികളെ വിസ്തരിച്ചു കഴിഞ്ഞിട്ടുണ്ടെന്നും ഫട്നാവിസ് കൂട്ടിച്ചേര്ത്തു. സംവരണം ആവശ്യപ്പെട്ട് കാവി പതാകകളുമായാണ് ലക്ഷങ്ങള് അണിനിരന്നത്.
സമരം സമാധാനപരമായിരുന്നെങ്കിലും ഗതാഗതക്കുരുക്കുമൂലം ജെജെ ഫ്ളൈ ഓവറും ദക്ഷിണ മുംബൈയിലെ സ്കൂളുകളും അടച്ചിട്ടു. സകല് മറാത്ത സമാജിന്റെ നേതൃത്വത്തിലാണ് മാര്ച്ച് സംഘടിപ്പിച്ചത്.
