ലങ്കയില്‍ അജയ്യര്‍

കൊളംബോ: ബാറ്റും പന്തും കൊണ്ട് കളിക്കളത്തില്‍ വിസ്മയം തീര്‍ത്ത കോഹ്‌ലിക്കും കൂട്ടര്‍ക്കും ഇന്നിങ്‌സ് വിജയം. സമസ്ത മേഖലകളിലും തിളങ്ങിയ ഇന്ത്യ രണ്ടാം ടെസ്റ്റില്‍ ഒരിന്നിങ്ങ്‌സിനും 53 റണ്‍സിനും ശ്രീലങ്കയെ കെട്ടുകെട്ടിച്ചു. ഇതോടെ മൂന്ന് മത്സരങ്ങളുടെ പരമ്പര ഇന്ത്യക്ക് സ്വന്തം (2-0). ആദ്യ ടെസ്റ്റിലും കോഹ്‌ലിയും കൂട്ടുകാരും വിജയക്കൊടി നാട്ടിയിരുന്നു.

ബാറ്റുകൊണ്ട് അജിങ്ക്യ രഹാനെയും ചേതേശ്വര്‍ പൂജാരയും പന്തുകൊണ്ട് ജഡേജയും അശ്വിനും അരങ്ങുവാണതോടെ ശ്രീലങ്ക അടിതെറ്റി വീണു. രണ്ട് ഇന്നിങ്ങ്‌സുകളിലുമായി ജഡേജയും അശ്വിനും ഏഴു വിക്കറ്റുകള്‍ വീതം പിഴുതെടുത്തു. ബാറ്റിങ്ങിലും തിളങ്ങിയ ജഡേജ മാന്‍ ഓഫ് ദ മാച്ച് അവാര്‍ഡിനര്‍ഹനായി.

439 റണ്‍സ് ലീഡ് വഴങ്ങി ഫോളോഓണ്‍ ചെയ്ത ശ്രീലങ്ക നാലാം ദിനത്തില്‍ 386 റണ്‍സിന് പുറത്തായി. കുശാല്‍ മെന്‍ഡിസും (110) ദിമുത് കരുണരത്‌നയും (141) സെഞ്ചുറി നേടിയിട്ടും ശ്രീലങ്കയ്‌ക്ക് തോല്‍വിയൊഴിവാക്കാനായില്ല.

ലോക ഒന്നാം നമ്പര്‍ സ്പിന്നറായ ജഡേജയാണ് രണ്ടാം ഇന്നിങ്ങ്‌സില്‍ ശ്രീലങ്കയുടെ പ്രതിരോധം തകര്‍ത്ത് ഇന്ത്യയെ വിജയതീരത്തേയ്‌ക്ക് അടുപ്പിച്ചത്. 39 ഓവറില്‍ 152 റണ്‍സ് വിട്ടുകൊടുത്ത് ജഡേജ അഞ്ചു വിക്കറ്റുകള്‍ വീഴ്‌ത്തി. അശ്വിനും ഹാര്‍ദിക് പാണ്ഡ്യെയും രണ്ടു വിക്കറ്റുള്‍ വീതമെടുത്തപ്പോള്‍ യാദവ് ഒരു വിക്കറ്റ് വീഴ്‌ത്തി.

രണ്ടിന് 209 റണ്‍സെന്ന സ്‌കോറിനാണ് ശ്രീലങ്ക ഇന്നലെ ഇന്നിങ്ങ്‌സ് തുടങ്ങിയത്. മൂന്നാം ദിനത്തില്‍ 92 റണ്‍സുമായി പുറത്താകാതെ നിന്ന കരുണരത്‌ന സെഞ്ചുറി നേടി. 307 പന്തില്‍ 16 ഫോറുകളുടെ അകമ്പടിയില്‍ 141 റണ്‍സ് നേടി. ജഡേയുടെ തിരിയുന്ന പന്തില്‍ രഹാനെ ക്യാച്ചെടുത്ത് കരുണരത്‌നയെ പുറത്താക്കി.

മുന്‍ നായകന്‍ മാത്യൂസ്ും (36) ഡിക്ക്‌വെല്ലയും (31) മടങ്ങിയതോടെ ശ്രീലങ്കയ്‌ക്ക് പിടിച്ചു നില്‍ക്കാനായില്ല. 386 റണ്‍സിന് അവരുടെ രണ്ടാം ഇന്നിങ്ങ്‌സ് അവസാനിച്ചു.

സ്‌കോര്‍ബോള്‍ഡ്

ഇന്ത്യ ഒന്നാമിന്നിങ്‌സ് 622/9 ഡിക്ല.

ശ്രീലങ്ക ഒന്നാമിന്നിങ്‌സ് 183

ശ്രീലങ്ക രണ്ടാമിന്നിങ്ങ്‌സ്

കരുണരത്‌ന സി രഹാനെ ബി ജഡേജ 141, ഉപുല്‍ തരംഗ ബി യാദവ് 2, കുശാല്‍ മെന്‍ഡിസ് സി സാഹ ബി പാണ്ഡ്യെ 110, പുഷ്പകുമാര ബി അശ്വിന്‍ 16, ദിനേശ് ചാണ്ടിമല്‍ സി രഹാനെ ബി ജഡേജ 2, മാത്യൂസ് സി സാഹ ബി ജഡേജ 36, എന്‍. ഡിക്ക്‌വെല്ല സി രഹാനെ ബി പാണ്ഡ്യെ 31, പെരേര സ്റ്റമ്പഡ് സാഹ ബി ജഡേജ 4,ഡിസില്‍വ സി രഹാനെ 9, ആകെ 386.

വിക്കറ്റ് വീഴ്ച: 1-7, 2-198, 3-238, 4-241, 5-310, 6-315, 7-321, 8-343, 9-384.

ബൗളിങ്: യാദവ് 13-2-39-1, അശ്വിന്‍ 37.5-7-132-2, മുഹമ്മദ് ഷമി 12-3-27-0, ജഡേജ 39-5-152-5, ഹാര്‍ദിക് പാണ്ഡ്യെ 15-2-31-2.