ന്യൂദല്ഹി: ലോകത്തെ ഏറ്റവും വലിയ ഹിന്ദു പുസ്തക പ്രസാധകരായ ഗോരഖ്പൂരിലെ ഗീതാപ്രസ് ആധുനികവത്കരണത്തിന് പുതിയ പദ്ധതി നടപ്പാക്കുന്നു. 11 കോടി വിലവരുന്ന ജര്മന് നിര്മ്മിത അച്ചടി യന്ത്രങ്ങള് വാങ്ങാനാണ് തീരുമാനം. പുതിയ സംവിധാനത്തോടെ അച്ചടിച്ചെലവും സമയവും ലാഭിക്കാന് സാധിക്കുമെന്ന് മാനേജര് കെ.കെ.എം. ത്രിപാഠി പറഞ്ഞു.
പുസ്തകങ്ങളുടെ ബൈന്റിങ്ങിനും യന്ത്രങ്ങള് വാങ്ങുന്നുണ്ട്. പതിനായിരം പുസ്തകങ്ങള് ഒരു സമയത്ത് ബൈന്റ് ചെയ്യാനാകും. ചെലവ് കുറയുന്നതോടെ പുസ്തകങ്ങളുടെ വിലയും കുറയുമെന്ന് അദ്ദേഹം വ്യക്തമാക്കി. ഹൈന്ദവ സംസ്കാരത്തെയും ഇതിഹാസങ്ങളെയും ആസ്പദമാക്കി 14 ഭാഷകളിലായി 65 കോടിയിലേറെ പുസ്തകങ്ങള് ഇതുവരെ ഗീതാ പ്രസ് പുറത്തിറക്കിയിട്ടുണ്ട്. 1923ലാണ് പ്രസ് ആരംഭിച്ചത്.
സാമ്പത്തിക പ്രതിസന്ധിയെ തുടര്ന്ന് പ്രസ് അടച്ചുപൂട്ടുകയാണെന്ന ഊഹാപോഹം അധികൃതര് നിഷേധിച്ചു. ചില കേന്ദ്രങ്ങള് ഇത്തരം പ്രചാരണങ്ങള് നടത്തി പ്രസ്സിനെ സംരക്ഷിക്കാനെന്ന പേരില് പണം പിരിക്കുന്നുണ്ട്. ഞങ്ങള് സംഭാവനകള് സ്വീകരിക്കുന്ന സ്ഥാപനമല്ല. അതിനാല് ഇത്തരം തട്ടിപ്പില് ആരും വീഴരുത്. ട്രസ്റ്റി ലാല് മണി വ്യക്തമാക്കി.
ഇരുനൂറ് ജീവനക്കാര് ഇവിടെയുണ്ട്. ശമ്പളത്തിന്റെയോ ആനുകൂല്യത്തിന്റെയോ പ്രശ്നമില്ല. അദ്ദേഹം ചൂണ്ടിക്കാട്ടി. ഏതാനും ദിവസം മുന്പ് ഒരു ടിവി ചാനല് പ്രസ് അടച്ചുപൂട്ടുകയാണന്ന് വാര്ത്ത നല്കിയതോടെയാണ് വ്യാജപ്രചാരണമുണ്ടായത്.
